2019 jyly ǵaryshqa bıletter satyla bastaıdy

ASTANA. QazAqparat - SpaceX-tan keıin, taǵy bir amerıkalyq kompanııa barlyq ushqysy keletinder úshin ǵaryshqa sapardy bastaýǵa daıyn ekenin jarııalady, dep jazady Spacenews. 

Blue Origin jeke aeroǵarysh kompanııasynyń aǵa vıtse-prezıdenti Rob Meıerson taıaýda ǵaryshqa aparatyn sýborbıtalyq saıahat bıletteri 2019 jyly satylymǵa túsetinin málimdedi.

«Aldaǵy ýaqytta ǵaryshqa alǵashqy synaq retinde jolaýshylarmen birge usha bastaımyz. Al, bıletter 2019 jyly satylymǵa shyǵady», - dep ýáde etti Meıerson.

Qazirgi tańda kompanııanyń ǵaryshqa jasaǵan barlyq sapary jolaýshylarsyz júrgizilgen, biraq Blue Origin budan buryn synaq ushyrylymdarǵa onyń qyzmetkerleri qatysatynyn málim etken bolatyn.

Meıerson ǵaryshqa ushý bıletiniń baǵasyn aıtqan joq.

2015 jyly kompanııa New Shepard sýborbıtalyq kemesin segiz ret ushyrǵan. Sońǵy ushyrylym 29 sáýirde ótti. Kelesi ushyrylymnyń qashan bolatyny ázirge belgisiz. Kompanııadaǵy derekkóz onyń jazda bolatynyn ǵana rastady.

Blue Origin kompanııasynyń negizin amerıkalyq mıllıarder, 2000 jyly álemdegi eń dáýletti adam atanǵan Djeff Bezos qalaǵan.