2019 jyly Astanada 10 myń aqyly avtoturaq ashylady
«Astananyń kólik turaǵy keńistigi» JShS málimdegendeı, 2019 jyldyń sońyna deıin qala aýmaǵynda 10 myń aqyly turaq oryndary ashylady dep josparlanyp otyr.
«Aqyly turaq oryndaryn iske qosýdyń kelesi kezeńi sol jaǵalaýdaǵy Qonaev, Dostyq kóshelerinde, oń jaǵalaýdaǵy Kenesary, Beıbitshilik, Seıfýllın, Jeltoqsan jáne Jeńis kóshelerinde júzege asady. Avtoqumarlarǵa bir aı buryn habarlaımyz. Aqyly turaqtar paıda bolatyn oryndarda bul jerdiń aldaǵy ýaqytta aqyly bolatyny týraly eskertý sıpatyndaǵy aqparattyq qalqandar ornatylady»,- dedi kompanııanyń baspasóz hatshysy A. Amantaeva.
Avtoturaq paıdalanýshylardyń pikirin saralaı kele, 10 aılyq jumystyń nátıjesinde aqyly turaqtar júıesi kólikterdiń jol boıynda beı-bereket qoıylýyn boldyrmaýǵa, Nurjol jelekjolyn jaıaý júrginshiler úshin qaýipsiz etýge septigin tıgizdi. Jelekjol mańyndaǵy kóshelerdiń ótkizý qabileti de edáýir ulǵaıdy.
«Aqyly turaqtar týrıster úshin yńǵaıly boldy. Qydyrýshy týrıster endi Nurly jol jelekjolynda qysylyp-qymtyrylmaı, beı-bereket qoıyp tastaǵan kólikter arasynan ótetin oryn izdep júrmeıtin boldy. Endi demalýshylar Nurlyjol jelekjolynyń ekinshi jaǵyna erkin óte beredi. Jobanyń maqsaty da osy bolatyn. Kópshilik oılaǵandaı tabys tabý emes, bastysy yńǵaılylyq», - dedi A.Amantaeva.
Ol sonymen qatar, 23 sáýirden bastap aqyly turaq erejesin buzǵany úshin aıyppul esebinen Astana bıýdjetine 66,7 mln teńge kelip túskenin jetkizdi. «Astananyń kólik turaǵy keńistigi» JShS ázirge aqyly turaqtyń tólemaqysy ózgermeıtinin aıtty.
«Aqyly turaq qunyn kóterý 2019 jyldyń kúzinde qaralady», - dedi Amantaeva.
Esterińizge sala keteıik, pılottyq rejımdegi joba 2018 jyldyń 15 qańtarynda Nurlyjol jelekjolynda iske qosyldy. Ákimshilik ortalyqta 487 aımaqtyń 24-i sertıfıkattalǵan arnaıy jabdyqtarmen - parkomat, jol belgileri, aqparattyq taqta jáne tańbalarmen jabdyqtalyp, aqyly boldy.
