2016 jyldan beri granttyq qarjylandyrý boıynsha 15 joba eksportqa shyqqan
Bul týraly Premer-Mınıstrdiń orynbasary Eraly Toǵjanovtyń tóraǵalyǵymen ótken Ǵylymı, ǵylymı-tehnıkalyq jobalar men baǵdarlamalardy iske asyrý máseleleri jónindegi vedomstvoaralyq komıssııanyń birinshi otyrysy barysynda málim boldy, dep habarlaıdy QazAqparat.
COVID-19 taralýyna jol bermeý jónindegi vedomstvoaralyq komıssııasynyń Telegram kanalyndaǵy málimetterge qaraǵanda, elimizde 2016 jyldan beri kommertsııalandyrýdy granttyq qarjylandyrý boıynsha 151 joba bekitilgen. Onyń ishinde 93 bastama iske asyrylyp qalǵan 58-i iske asyrylyp jatyr, 15 joba eksportqa shyqty. Jobalardy iske asyrý aıasynda 16,4 mlrd teńgeniń ónimi satyldy, onyń ishinde eksportqa 346,7 mln teńgeniń ónimi shyǵaryldy. Tólengen salyq somasy 5,2 mlrd teńge, 1 411 jumys orny quryldy. Ǵalymdardyń tabysy 5,7 mlrd. teńge boldy.
E.Toǵjanov atap ótkendeı, jobalardy kommertsııalandyrýǵa baǵyttalǵan granttardyń negizgi maqsaty tehnologııalardy qurý jáne olardy alǵashqy satylymǵa jetkizý bolyp tabylady. Munyń bári Qazaqstanǵa ekonomıkadaǵy ǵylymnyń ózindik zııatkerlik áleýetin qurýǵa, Ǵylym qory jelisi boıynsha iske asyrylatyn ǵylymı-tehnıkalyq qyzmettegi jobalardy yntalandyrý sharalaryn kúsheıtýge múmkindik beredi.
Jıynda osy atqarylǵan jumys týraly esepti baıandamalarmen ımport almastyrý salasynda memlekettik granttar alǵan jáne iske asyrǵan kásiporyndardyń basshylary sóz sóıledi. Keıbir zańdarǵa ózgerister engizý qajet ekendigi aıtyldy, bul memlekettik satyp alý rásimderin jeńildetýge jáne zııatkerlik ázirlemelerden kiris alýǵa múmkindik beredi.
Vıtse-Premer beıindi mınıstrlikter men vedomstvolardyń basshylaryna problemalyq máselelerdi pysyqtap, olardy sheshý boıynsha egjeı-tegjeıli usynystar engizýdi tapsyrdy. «Samuryq-Qazyna» Ulttyq qoryna grant alýshylardy uzaq merzimdi tapsyrystarmen (offteık) qamtamasyz etý máselesin pysyqtaý mindeti qoıyldy. Ǵylym qoryna kommertsııalandyrý jobalary úshin bıznes-akseleratsııa baǵdarlamasyn uıymdastyrý tapsyryldy.
Keńes sońynda Eraly Toǵjanov Úkimet, memlekettik organdar, grant alýshylar men ǵalymdardyń aldyna birqatar naqty mindetter qoıdy. Olardyń eń bastysy-óńdeý ónerkásibindegi 5-6 qaıta óńdeýge kóshý úshin otandyq ǵylymnyń áleýetin tartý.
Keńes jumysyna ortalyq memlekettik organdardyń, jetekshi ǵylymı ınstıtýttardyń ókilderi, ınnovatsııalyq jobalar men baǵdarlamalardy ázirleýshiler, memlekettik grant alýshylar qatysty.