2009 jylǵy ushaq apatyna Airbus pen Air France kompanııalary kináli – Frantsııa soty
ASTANA. KAZINFORM – Frantsııanyń apellıatsııalyq soty 2009 jyly bolǵan AF447 reısiniń apatyna baılanysty Airbus pen Air France kompanııalaryn abaısyzda adam ólimine jol bergeni úshin kináli dep tanydy, dep habarlaıdy Al Jazeera telearnasy.
Parıj apellıatsııalyq soty eki kompanııa da Rıo-de-Janeırodan Parıjge baǵyt alǵan ushaqtyń apatyna «tolyq ári aıryqsha jaýapty» degen sheshim shyǵardy. Sot sheshimine sáıkes, Airbus pen Air France qaza tapqandardyń otbasylaryna 225 myń eýrodan ótemaqy tóleýge mindetteldi.
Qaıǵyly oqıǵa 2009 jylǵy 1 maýsymda bolǵan. Ushaq bortynda 216 jolaýshy men 12 ekıpaj múshesi bolǵan. Áýe kemesi Atlant muhıty ústinde radardan joǵalyp ketken. Ushaq qaldyqtary men qara jáshikteri aýqymdy izdeý jumystarynan keıin shamamen eki jyldan soń ǵana tabylǵan.
Tergeý barysynda ushaqtyń daýyl aımaǵyna tap bolǵany anyqtaldy. Ushý jyldamdyǵyn ólsheıtin Pıto tútikteriniń muzdanýy saldarynan avtopılot júıesi isten shyǵyp, keıin ekıpaj áýe kemesin basqarýdy joǵaltqan.
Prokýrorlar Airbus pen Air France kompanııalary datchıkterdegi aqaýlar týraly aldyn ala bilgenin, alaıda ushqyshtar mundaı tótenshe jaǵdaıǵa tıisinshe daıyndalmaǵanyn málimdedi. Al kompanııalar aıyptaýlardy joqqa shyǵaryp, apatqa ekıpaj qateligi sebep boldy degen ýáj aıtqan.
Sot sheshimi jarııalanǵannan keıin Airbus úkimge baılanysty Frantsııanyń Joǵarǵy sotyna shaǵym túsiretinin habarlady. Kompanııa ókilderiniń pikirinshe, apellıatsııalyq sottyń sheshimi 2023 jyly shyǵarylǵan aqtaý úkimine qaıshy keledi.
Aıta keteıik, Astana–Frankfýrt baǵytyndaǵy ushaq Aqtóbege shuǵyl qondy.
Al Seýlden shyqqan ushaq Almatyǵa shuǵyl qonýǵa májbúr boldy.
