20 shtat Tramp ákimshiligin sotqa berdi

ASTANA. KAZINFORM — Kóbine demokrattar jetekshilik etetin 20 shtat ımmıgratsııalyq qyzmet talaptary men qarjylandyrýdy qysqartamyz dep qorqytqany úshin Tramp ákimshiligine qarsy sotqa shaǵym túsirdi, dep habarlaıdy The New York Times. 

Shtattyń bas prokýrorlary eki sotqa shaǵym túsirdi — biri Tótenshe jaǵdaılardy basqarý federaldy agenttigi men ishki qaýipsizdik mınıstrligine, ekinshisi kólik departamentine qarsy.

Shtattar atap ótkendeı, tasymaldaý, lańkestikke qarsy kúres jáne tótenshe jaǵdaılarǵa ázirlikke arnalǵan federaldy qarajatty qysqartý qaýipti jáne «zańsyz». Olardyń paıymdaýynsha, ákimshilik Kongrestiń shyǵyndar jónindegi ókilettigin zańsyz tartyp alyp, shtattardy Donald Tramptyń saıasatyn qabyldaýǵa májbúrleý úshin ámııannyń kúshin paıdalanyp otyr. 

Sotqa shaǵym túsirýge bastamashy bolǵandar — Kalıfornııa, Illınoıs, Nıý-Djersı, Rod-Aılend jáne Merılend shtattary. Olarǵa Kolorado, Konnektıkýt, Delaver, Gavaı, Men, Massachýsets, Mıchıgan, Mınnesota, Nevada, Nıý-Meksıko, Nıý-Iork, Oregon, Vermont, Vashıngton jáne Vıskonsın qosyldy.

Barlyq shtatta (Nevada men Vermontta ǵana respýblıkashyldar) bas prokýrorlar men gýbernatorlar — demokrattar. Sot protsesin júrgizip jatqan Kalıfornııanyń bas prokýrory Rob Bonta málimdemesinde prezıdent Tramp ómirlik mańyzdy qarjylandyrýdy «usaq tıyn» retinde qarastyryp jatqanyn qosyp ótti. 

Ótken aıda Aq úı ımmıgratsııalyq bılikpen tolyq yntymaqtaspaıynsha, panalaý ıýrısdıktsııalaryn qarjylandyrýdy toqtatamyz dep qorqytqan eki buıryq týraly jarııalady.

— Eger demokratııalyq bas prokýrorlar saıası oıyndarmen aınalyspaı, qylmyskerlerdi qýdalaýǵa jáne Tramp ákimshiligimen birge óz qaýymdaryndaǵy zańsyz ımmıgrant-gangsterler máselesin sheshýge nazar aýdarsa, amerıkandyqtar úshin jaqsy bolar edi, — dedi Aq úı ókili Kýsh Desaı shaǵymdar týraly suraqqa jaýap bere otyryp.

Buǵan deıin AQSh-ta 12 shtat Trampty baj salyǵyna baılanysty sotqa bergenin jazǵan bolatynbyz.