20 sáýirde medıtsınalyq poıyz Qazaqstan óńirlerine jolǵa shyǵady
ASTANA. KAZINFORM – Bıyl «Járdem» medıtsınalyq poıyzy arqyly 20 sáýirden jeltoqsan aıyna deıin 90 myń aýyl turǵyny emdik-keńes berý qyzmetin aqysyz alady dep kútilýde.
Bastama aıasynda QR Densaýlyq saqtaý mınıstri Aqmaral Álnazarova men «Samruk-Kazyna Trust» KQ bas dırektory Alfııa Adıeva «Medıtsınalyq poıyzdar» jobasy boıynsha jaýapkershilikti kúsheıtý men baılanysty nyǵaıtý týraly yntymaqtastyq memorandýmyna qol qoıdy.
«Qujatta qos jaqtyń jaýapkershiligin nyǵaıtý, yntymaqtastyq maqsattaryna qol jetkizýdi qamtamasyz etý sııaqty máseleler qaralǵan. Ótken jyly medpoıyz 121 stantsııany aralasa, bıyl QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen 140 shalǵaı eldimekendegi azamattarǵa tegin medıtsınalyq jáne quqyqtyq kómek kórsetiledi», – dep atap ótti «Samruk-Kazyna Trust» qorynyń bas dırektory Alfııa Adıeva.
Osylaısha Mınıstrlik quramdy bilikti mamandarmen, talapqa saı qural-jabdyqpen qamtamasyz etip, olardy turaqty túrde nazarynda ustasa, Qor jalpy jobany, poıyzdyń úzdiksiz qatynaýyn úılestirip, Ulttyq komıssııa usynysymen zańgerler jumysyn qarastyrady.
