20 naýryzdan bastap Ózbekstanda Temu buǵattalady

TAShKENT. KAZINFORM - Ózbekstan zańnamasynyń talaptaryna sáıkes, 20 naýryzdan bastap Temu platformasyn paıdalaný belgilengen tártipte shekteledi, dep habarlaıdy Kazinform Ózbekstan Salyq komıtetiniń baspasóz qyzmetine silteme jasap.

Elektrondyq kommertsııa operatorlary, atap aıtqanda, elektrondyq kommertsııa platformasynyń operatorlary retinde tek zańdy tulǵalar – Ózbekstan rezıdentteri ǵana jumys isteı alatyny atap ótilgen.

«Elimizdiń azamattaryna qyzmet kórsetetin sheteldik elektrondyq saýda platformalarynyń qyzmetin zertteý barysynda keıbir elektrondyq saýda platformalary tarapynan Ózbekstan Respýblıkasy elektrondy saýda, bólshek saýda, jarnama, jeke derekterdi qorǵaý, tutynýshylardyń quqyqtaryn qorǵaý, avtorlyq jáne sabaqtas quqyqtar salasyndaǵy zańnama talaptaryn saqtamaıtyny anyqtaldy», - delingen habarlamada.

Túsinispeýshilikterdi boldyrmaý úshin komıtet búginnen bastap Temu platformasyna tapsyrys bermeýdi surady.

«Bul jaǵdaıda, eger tapsyrys buǵan deıin jasalǵan bolsa, platformada qaıtarýdy uıymdastyrý usynylady», - delingen habarlamada.

Perspektıvalyq jobalar jónindegi ulttyq agenttik jáne Salyq komıteti Ózbekstan aýmaǵynda lokalızatsııalamaǵan nemese elde Salyq komıtetiniń elektrondy qyzmetterin kórsetetin sheteldik kompanııalar men marketpleısterdiń tizimine enbegen sheteldik elektrondyq saýda platformalarynyń qyzmetterin paıdalanbaýǵa, saqtyq sharalaryn qoldanýǵa, mundaı sýbektilerge jeke jáne ózge de málimetterdi bermeýge shaqyrdy.

Eske sala keteıik, Qazaqstan men Ózbekstan arasynda qosymsha 4 saýda dálizi ashylýy múmkin.