20 qańtarda eldegi qaı joldar ashyq, qaısysy jabyq

ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, 2025 jylǵy 20 qańtar kúni saǵat 08:00-den bastap Abaı oblysynda respýblıkalyq mańyzy bar «QHR shekarasy – Maıqapshaǵaı – Zaısan – Qalbataý – Semeı – Pavlodar – RF shekarasy» avtojolynyń 910-1002-shaqyrym aralyǵynda (Qalbataý aýyly – Kókpekti aýyly ýchaskesi) jol barlyq avtokólik túrleri úshin ashyq.

Jabyq joldar

Sonymen qatar Jetisý oblysynda aýa raıynyń qolaısyzdyǵyna baılanysty «Úsharal – Dostyq – QHR shekarasy» avtojolynyń 84-164-shaqyrym aralyǵynda (Kóktuma stantsııasy – Dostyq stantsııasy ýchaskesi) barlyq kólik túri úshin qozǵalys shekteldi.

Al Pavlodar oblysynda «Astana – Shiderti – Pavlodar – Ýspenka – RF shekarasy» avtojolyndaǵy jolaıyryǵynyń kópir qurylymynyń shetki arqalyqtary zaqymdanýyna baılanysty «Qalqaman» jolaıyryǵy ýchaskesinde – Qalqaman eldi mekenine kireberis pen Astana baǵytyna shyǵatyn joly ýaqytsha jabyldy.

Eske salaıyq, 20 qańtarda Qazaqstannyń 12 óńirinde aýa raıyna baılanysty eskertý jarııalandy.