20 qalada 5G uıaly baılanys jelisin qosý jumystary bastalmaq

ASTANA. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın elimizde ınternet sapasyn kóterýge qatysty jańa ulttyq joba ázirnelip jatqanyn aıtty, dep habarlaıdy QazAqparat tilshisi.

«Ulttyq joba aıasynda eldi mekenderdi, avtojoldardy keń jolaqty ınternetpen qamtamasyz etý jáne olardyń sapasyn jaqsartý jónindegi is-sharalar kózdelgen. Jobanyń maqsaty – ınternetke 100 Mbıt/s qosylatyn telekommýnıkatsııalyq ınfraqurylymmen qamtamasyz etý», - dedi B. Mýsın Parlament Májilisindegi Úkimet saǵatynda.

Onyń aıtýynsha, 2027 jyly keń jolaqty ınternettiń úı jelilerine qosylýy deńgeıi 100 paıyzǵa, sondaı-aq respýblıka boıynsha 5G tehnologııasy 75 paıyzǵa jetetin bolady. Al ekonomıkada jalpy ishki ónimdegi baılanys kórsetkishi 2 paıyzǵa jetpek.

«Ulttyq joba aıasyndaǵy basty is-sharanyń biri – optıkany 3 myń eldi mekenge jetkizý. Dúnıejúzilik Bankpen birlesip ınternet jetkizý úshin kishi jáne orta operatorlardy sýbsıdııalaý, ıaǵnı shyǵyndaryn óteý úshin arnaıy granttar beretin bolamyz», - dedi mınıstr.

Kelesi is-shara - bul respýblıkalyq jáne oblystyq joldardyń boıynda talshyqty-optıkany júrgizý.

«Osy ınfraqurylym negizinde jol boıynda keńjolaqty uıaly baılanys ınterneti, ıaǵnı 4G qamtamasyz etiledi. 20 qalada 5G uıaly baılanys jelilerin engizý jáne salý qolǵa alynady. Elimizdiń operatorlaryn 4G, 5G tehnologııalaryna ınvestıtsııa salýǵa yntalandyrý úshin olarǵa tólem stavkalaryn nólge túsirý boıynsha is-sharalar júrgiziledi. Osy oraıda elimizdiń aýmaǵynda 2027 jylǵa deıin 3 jarym myńnan astam bazalyq stantsııa qoıylatyn bolady», - dedi vedomstvo basshysy.

Budan buryn habarlanǵandaı, jaqynda Úkimet basshysy Álıhan Smaıylov bir aı ishinde atalǵan ulttyq jobany pysyqtaýdy tapsyrdy.

Foto:gov.kz