2 myńnan astam adam ońtústikten soltústikke kóship barýǵa nıetti
Búgin bul týraly Ońtústik Qazaqstan oblysy ákimi Janseıit Túımebaev aýdan, qala ákimderimen jáne oblystyq basqarmalar basshylarynyń qatysýymen ótken selektorlyq májiliste málim etti, dep habarlaıdy QazAqparat shahar basshysynyń baspasóz qyzmetine silteme jasap.
«Elbasy qoıǵan mindetterdiń biri ishki kóshi-qon protsesterin retteý jáne eńbek resýrstarynyń teńgerimdiligin arttyrý, halyqty birkelki jaıǵastyrý maqsatynda eńbek kúshi mol aımaqtan, eńbek kúshi jetispeıtin respýblıkamyzdyń soltústik óńirlerine óz erkimen halyqty qonystandyrý óte mańyzdy qadam. Jumyssyzdyq, halyqqa áleýmettik qoldaý kórsetý máseleleri boıynsha qıyndyqtar bolýy múmkin, sondyqtan qonys aýdaram deýshilerge kómek kórsetýimiz kerek», -dedi Janseıit Qanseıituly.
Jıynda halyqty ońtústikten soltústikke kóshirý jumystary jóninde baıandaǵan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Muhıt Otarshıev 2014-2016 jyldary «Jumyspen qamtý 2020 jol kartasy» baǵdarlamasy sheńberinde oblystan barlyǵy 154 otbasy qonys aýdaryp, kóshý shyǵyndary ótelgendigin jetkizdi.
Onyń aıtýynsha, basqarma tarapynan qonys aýdarǵan azamattarǵa sol óńirdegi ýákiletti organdar arqyly monıtorıng jumystary júrgizilgen. Qazirgi tańda kóship barǵandardyń 48-i aýyl sharýashylyǵymen aınalyssa, 42 azamat bilim salasynda, 11 adam jergilikti atqarý organdarynda, 12 adam qyzmet kórsetý, 7 adam densaýlyq saqtaý salasynda eńbekpen qamtylǵan.
Al óńiraralyq eńbek naryǵyn damytýdyń sharalaryna 5780 azamat qatysyp, olardyń 2019-y soltústikke qonys aýdarýǵa nıetti ekendikterin jetkizgen.
Sondaı-aq májiliste sóz alǵan oblystyq máslıhat depýtaty Jańabaı Aǵabekov ońtústik halqyn soltústikke kóshirý erikti túrde júrip jatqandyǵyn alǵa tartty. Olarǵa úkimet tarapynan da aıtarlyqtaı kómek kórsetiledi. Naqty aıtqanda, qonys shyǵyndary esebinde otbasy músheleriniń árqaısysyna 35 AEK kóleminde, ıaǵnı 79 myń teńge ótemaqy tólenedi. Budan bólek, bir jylǵa deıin páter jaldaýǵa jumsalatyn shyǵyn da - memleket esebinen. Áleýmettik qamsyzdandyrý, kóshi-qon kvotasyna da qarjy qarastyrylǵan.
«Kóshý ár adamnyń jeke isi. Eshkimdi kúshtemeımiz. Degenmen nıet bildirgenderge jol shyǵyny, baspana jaldaýdy aıtpaǵanda, sol barǵan jerine úırenip ketkenshe, qarjylaı kómek beremiz. Jumysqa turýyn da qadaǵalap otyramyz»,-dedi Jańabaı Moldabaıuly.
Máseleni qorytyndylaı kele óńir basshysy halqy tyǵyz ornalasqan Maqtaaral aýdanynda bul jumystardyń sylbyr júrgizilip jatqandyǵyn synǵa aldy.
Aıta keteıik, Maqtaral aýdany halqy óte tyǵyz aýdandardyń birine jatady. Búgingi tańda aýdanda atalǵan másele boıynsha atqarylyp jatqan jumystar jetkiliksiz. Sońǵy eki jylda bar-joǵy aýdannan 12 otbasy ǵana elimizdiń soltústik óńirlerine qonys aýdarǵan.
Soltústik óńirlerge qonys aýdarýǵa nıeti bar oblys turǵyndarynyń erikti qonys aýdarýyna yqpal jasaý úshin oblys kásipkerlerin qatystyra otyryp sol óńirlerge is-sapar uıymdastyrýdy júktegen oblys basshysy aýdan, qala ákimderine, salalyq basqarmalarǵa birqatar tapsyrmalar berdi.
