2 mlrd teńge zalal keltirgen kredıttik bıýro isi boıynsha tergeý aıaqtaldy
ASTANA. KAZINFORM — Almaty qalasy boıynsha AFM departamenti «Eńbek resýrstaryn damytý ortalyǵy» AQ jáne «Birinshi kredıttik bıýro» JShS basshylyǵyna qatysty tergeýdi aıaqtady.
Olarǵa laýazymdyq ókilettikterdi teris paıdalaný jáne para alý faktileri boıynsha kúdik taǵylǵan.
«Eńbek resýrstaryn damytý ortalyǵy» – jeke tulǵalardyń tabystary týraly derekterdiń biryńǵaı memlekettik operatory. Bul málimetter qaryz alýshylardyń tólem qabiletin baǵalaý kezinde kredıttik bıýrolar men qarjy uıymdary úshin asa mańyzdy jáne onyń balamaly zańdy kózi joq.
Atalǵan derekterdiń negizgi paıdalanýshylary «Memlekettik kredıttik bıýro» men «Birinshi kredıttik bıýro».
2020 jyly Eńbek resýrstaryn damytý ortalyǵynyń burynǵy prezıdenti D.R. Argandykov Birinshi kredıttik bıýronyń bas dırektory R.J.Omarovpen zańsyz kelisim jasasyp, sonyń nátıjesinde Birinshi kredıttik bıýroǵa qosymsha 5% tabys alýǵa múmkindik bergen.
Eger Memlekettik kredıttik bıýro kórsetilgen qyzmetterdiń jalpy kóleminen 30% tabys alsa, Birinshi kredıttik bıýro burynǵy 30%-dyń ornyna 35%-ǵa deıin tabys ala bastaǵan. Osylaısha, Eńbek resýrstaryn damytý ortalyǵynyń úlesi 70%-dan 65%-ǵa deıin tómendegen.
2025 jyldyń basynda Eńbek resýrstaryn damytý ortalyǵynyń prezıdenti bolyp A.Sarbasov taǵaıyndalǵannan keıin de Birinshi kredıttik bıýronyń paıdasyna kózdelgen bul teń emes sharttar saqtalǵan.
Tergeý barysynda Birinshi kredıttik bıýroǵa ózge qatysýshylarǵa qaraǵanda artyqshylyq beretin shema áshkerelendi.
Atap aıtqanda, Argandykov pen Omarovtyń kelisýimen Eńbek resýrstaryn damytý ortalyǵy men Birinshi kredıttik bıýro arasyndaǵy aqparat almasý arnalaryna suranystardy jedel óńdeýge múmkindik beretin arnaıy servıs ornatylǵan.
Al Eńbek resýrstaryn damytý ortalyǵy men Memlekettik kredıttik bıýro arasyndaǵy júıege kerisinshe, suranystardy óńdeýdi baıaýlatatyn zııandy baǵdarlamalyq qamtamasyz etý engizilgen.
Osynyń saldarynan memleketke, naqtyraq aıtqanda Eńbek resýrstaryn damytý ortalyǵyna 2 mlrd teńgeden astam zalal keltirilgen.
2025 jylǵy maýsymda Argandykov pen Omarovtyń Sarbasovqa 75 myń AQSh dollary kóleminde kezekti syıaqy bergeni anyqtaldy. Bul qarajat Birinshi kredıttik bıýronyń zańsyz tabys tabý shemasyn saqtap qalý úshin berilgen.
Atalǵan tulǵalar ustaldy.
Sot sanktsııasymen olardyń 1 mlrd teńgeden astam somaǵa baǵalanatyn jyljymaly jáne jyljymaıtyn múlkine, sondaı-aq baǵaly qaǵazdaryna tyıym salyndy.
Іs materıaldary tanysý úshin joldandy.
QR QPK-niń 201-babyna sáıkes ózge málimetter jarııa etilmeıdi.
Aıta ketelik polıtsııa kıberqylmystyń jańa túri týraly eskertken edi.