2 mln gektar alqapta shegirtkege qarsy kúres aıaqtaldy

ASTANA. KAZINFORM — QR Premer-Mınıstriniń orynbasary Serik Jumanǵarınniń tóraǵalyǵymen ótken respýblıkalyq jedel shtabtyń kezekti otyrysynda shegirtkege qarsy kúres boıynsha qazirgi jaǵdaı qaraldy.

Búgingi tańda hımııalyq óńdeý 2 mln ga alqapta júrgizildi, bul — boljanǵan óńdeý kóleminiń 77,4 paıyzy. 

Abaı, Atyraý, Shyǵys Qazaqstan, Batys Qazaqstan jáne Qyzylorda oblystarynda ıtalııalyq prýsqa qarsy óńdeý aıaqtaldy.

Aqmola jáne Soltústik Qazaqstan óńirlerinde jumys bastalady.

Ótken aptada nóser jaýyn men qatty jelge baılanysty Aqtóbe jáne Qostanaı oblystarynda monıtorıng pen hımııalyq óńdeý toqtatylǵan bolatyn.

Jumys sársenbi-beısenbi kúnderi bastalady. 

Óńirler pestıtsıdtermen qamtamasyz etilgen, qajet bolǵan jaǵdaıda qosymsha tehnıka jiberiledi.

Aqtóbe oblysyndaǵy RF-men búkil shekara mańy aýmaǵy óńdeldi. Tekserý ózge óńirlerdiń shekarasynda júrgiziledi.

1 shildede Serik Jumanǵarın RF Úkimeti tóraǵasynyń orynbasary Dmıtrıı Patrýshevpen telefon arqyly sóılesip, Reseı tarapynan Qazaqstanmen shekaralas aýmaqtardy óńdeý aıaqtalǵany belgili boldy.

Sonymen qatar Serik Jumanǵarın óńir ákimdikterine jaǵdaı tolyq turaqtalǵanǵa deıin jumys qarqynyn tómendetpeýdi tapsyrdy.

Otyrysta agrarshylardy mıneraldy tyńaıtqyshtarmen qamtamasyz etý barysy da qaraldy.

Esterińizge sala keteıik, bıyl Memleket basshysynyń tapsyrmasy aıasynda tyńaıtqysh engizý kólemin 1,5 mln tonnaǵa deıin ulǵaıtý boıynsha sharalar qabyldandy.

Bul ótken jylmen salystyrǵanda 2,2 ese kóp.

Naýryz aıynan bastap otandyq tyńaıtqysh avanstyq sýbsıdııa tetigi arqyly iske asyp jatyr. 

Bul rette bıýdjettik sýbsıdııa sharýalarǵa arzandatylǵan tyńaıtqyshty satý úshin óndirýshilerdiń arnaıy shotyna aldyn ala aýdarylady.

Oblys ákimdikteriniń deregi boıynsha, 963 myń tonna tyńaıtqysh jetkizýge shart jasaldy, onyń 855 myń tonnasy jóneltilgen.