2-3 ball: Óskemende jer silkindi
ÓSKEMEN. KAZINFORM — Óskemen qalasynda 2-3 balldyq jer silkinisi tirkeldi.
2 shilde kúni saǵat 23:15–te Tótenshe jaǵdaılar mınıstrliginiń seısmıkalyq stansalar jelisi jer silkinisin tirkedi.
Jer silkinisiniń oshaǵy Almaty qalasynan soltústik-shyǵysqa qaraı 859 shaqyrym jerde ornalasqan.
Bul — Shyǵys Qazaqstan oblysy Úlken Naryn aýylynan 70 shaqyrym qashyqtyqta.
Jerasty dúmpýlerdi Óskemen qalasynyń turǵyndary sezdi.
Qýaty — 2-3 ball.
ShQO tótenshe jaǵdaılar departamenti baspasóz qyzmetiniń málimetine súıensek, jer silkingen kezde qulaǵan aýyr jıhazdardan saq bolý kerek.
«Balkonǵa júgirmeńiz, terezeler men aýyr zattardan alys turyńyz. Eger jer silkinisiniń kúshi az bolsa ǵımarattan shyqpańyz, dúmpýlerdiń aıaqtalýyn kútińiz. Lıftti paıdalanbańyz. Eger kóshede bolsańyz, ǵımarattar men elektr jelici janynan aýlaq bolyńyz, sebebi elektr symdarynyń úzilý qaýpi bar», — delingen aqparatta.
