1996 jyldan beri Konstıtýtsııalyq Keńeske 200-den astam ótinish kelip tústi - Únzıla Shapaq
«Konstıtýtsııa – memlekettiń eń joǵary zań kúshi bar Negizgi Zańy. Bıylǵy 30 tamyzynda respýblıkalyq referendýmda Qazaqstan Respýblıkasy Konstıtýtsııasynyń qabyldanǵanyna 25 jyl tolady. Negizgi Zańnyń mereıtoıy qazaqstandyq memlekettilikti damytýdaǵy aıtýly oqıǵa bolyp otyr», - dep atap ótti Ú. Shapaq Ortalyq kommýnıkatsııalar qyzmetinde.
Osy oraıda ol Konstıtýtsııalyq Keńestiń qyzmeti eldiń Negizgi Zańynyń myzǵymastyǵyn qamtamasyz etýge baǵyttalǵanyn atap ótti.
«1996 jylǵy aqpannan bastap qazirgi ýaqytqa deıingi kezeń ishinde Konstıtýtsııalyq Keńeske 200-den astam ótinish kelip tústi. 29 ótinishtiń máni Parlament qabyldaǵan jáne Memleket basshysyna qol qoıýǵa usynylǵan zańdardyń Konstıtýtsııaǵa sáıkestigin tekserý bolǵan. Al 15 ótinish boıynsha jalpy alǵanda 17 zań Konstıtýtsııaǵa sáıkes emes dep tanyldy. Konstıtýtsııalyq Keńes Konstıtýtsııanyń normalaryn resmı túsindirý týraly 100-den astam ótinishti qarady, olar boıynsha 80-nen astam normatıvtik qaýly qabyldandy. Osy qaýlylarda azamattardyń konstıtýtsııalyq quqyqtaryn iske asyrý jáne qorǵaý, QR azamattyǵy, saılaý júıesi, memlekettik organdardyń mártebesi men ókilettikteri, jáne basqa da máseleler qaraldy», - dedi Ú. Shapaq.
Parlament Palatalarynyń birlesken otyrystarynda Konstıtýtsııalyq Keńestiń Respýblıkadaǵy konstıtýtsııalyq zańdylyqtyń jaı-kúıi týraly 24 joldaýy jarııa etildi. Olarda Konstıtýtsııalyq Keńes eldegi zańdylyqtyń jaı-kúıine taldaý jasaıdy jáne adam quqyqtary men bostandyqtarynyń kepildikterin nyǵaıtý jóninde naqty usynystar beredi.
Únzıla Shapaqtyń aıtýynsha, Konstıtýtsııalyq Keńes konstıtýtsııalyq qundylyqtardy túsindirý men nasıhattaý jáne qoǵamnyń konstıtýtsııalyq mádenıetin arttyrý jóninde júıeli sharalar qabyldaýda.