19 shilde. Jylnama
Kazinform oqyrman nazaryna 19 shildege arnalǵan ataýly kúnder men este qalar oqıǵalar kúntizbesin usynady.
ESTE QALAR OQIǴALAR
1929 jyly Túrksib temirjol qurylysshylary mingen alǵashqy E-1441 poıyzy Qopa aýylyna kelip jetti. 1926 jyldyń 3 jeltoqsanynda KSRO Eńbek jáne qorǵanys komıteti Túrkistan-Sibir temirjolyn salý týraly arnaıy qaýly qabyldady.
1927 jyldyń 2 naýryz kúni KSRO halyq komıssarlary keńesi Túrkistan-Sibir temirjolyna qatysty qaýly qabyldandy. Temirjol Ortalyq Azııadaǵy maqta ósiretin aýdandardan shıkizat kózin Reseıge tasymaldaý, Qazaqstan men Ońtústik Reseıden astyqty Ortalyq Azııaǵa jetkizýde mańyzdy ról atqardy. Qurylysqa qazaqtyń 10 myń qurylysshysy jumyldyryldy.
1938 jyly Ońtústik Kempirsaı hromıtti ken orny bazasynda Don ken baıytý kombınatynyń negizi qalandy.
2005 jyly Pavlodar oblysy Baıanaýyl aýdanyndaǵy Teńdik aýylynda qazaqtyń alǵashqy akademıgi Qanysh Sátbaevtyń týǵan aýylynda (Semeı gýbernııasy Pavlodar ýezi Aqkeli bolysynyń №4 aýyly) ataqty jerlesterine arnalǵan bolashaq memorıaldy keshenniń alǵashqy irgetasy qalandy. Sharaǵa Astanadan, kórshi oblystardan kelgen qonaqtar, jergilikti halyq, barlyǵy myńdaǵan adam qatysty. Olar aýdan ortalyǵyndaǵy akademıktiń murajaıyna, Buqar jyraýdyń, fılosof jáne ádebıettanýshy Máshhúr Júsip Kópeıulynyń, qazaq poezııasynyń klassıgi Sultanmahmut Toraıǵyrovtyń basyna bardy.
2010 jyly Shanhaı yntymaqtastyq uıymynda Qazaqstan tóraǵalyǵynyń resmı veb-saıty – www.sco2011.kz qyzmetin bastady.
2011 jyly Qazaqstan áskerinde Jalpyásker serjanttar keńesi quryldy. Onyń quramyna óńirlik qolbasshylyq, QR jeke brıgadalary, ásker túrleriniń serjanttary kirdi. Jańadan qurylǵan organnyń basty mindeti – áskerı qyzmetshilerdi tárbıeleýde komandırlerge jalpy kómek kórsetý jáne yqpal etý.
2013 jyly Halyqaralyq astronavtıka akademııasyna (International Academy of Astronautics - IAA) qazaqstandyq ǵalymdar men ınjenerler qosyldy. QR Ulttyq ǵarysh agenttigi tóraǵasynyń orynbasary Meıirbek Moldabekov IAA akademıgi atansa, «Ulttyq ǵarysh zertteýleri men tehnologııalary ortalyǵy» AQ prezıdenti Jumabek Jantaev IAA korrespondent-múshesi bolyp saılandy.
2013 jyly Shyǵys Qazaqstan mamandandyrylǵan balet mektebiniń balerınalary Ispanııada ótken «Teńiz, kún, festıval!» halyqaralyq konkýrsynan úsh altyn, tórt kúmis jáne tórt qola júlde alyp keldi.
2014 jyly Qaraǵandy oblysy «Spassk» oqý ortalyǵynyń bazasynda «Altyn Úki-2014» arnaıy maqsattaǵy bólimshelerdiń snaıperlik juptarynyń halyqaralyq jarysy aıaqtaldy. Jarysqa Reseı, Ulybrıtanııa, Iordanııa, Pákistan, AQSh, Qytaı áskerı qyzmetshileri qatysty. Nátıjesinde Qazaqstannyń arnaıy maqsattaǵy qyzmetkerleri jeńimpaz atandy. 2-oryndy QHR, 3-oryndy Ulybrıtanııa áskerı qyzmetshileri aldy.
2017 jyly qazaqstandyq ánshi Dımash Qudaıbergen «Eń tanymal sheteldik ánshi» nomınatsııasy boıynsha Asian Music GaLa júldesin ıelendi. Marapattaý rásimi 19 shildede Qytaıdyń Gýanchjoý qalasynda ótti.
2018 jyly Tarbaǵataı aýdanynda Eleke qorǵanyna qazba jumystaryn júrgizý barysynda saq taıpasynyń bıleýshi taıpasynyń molasy tabyldy. Tabylǵan zattar bizdiń zamanymyzdan burynǵy VIII-VII ǵasyrlarǵa jatady.
2021 jyly Qazaqstan ókili Rýhııa Baıdúkenova estradalyq án oryndaýshylar baıqaýynyń Gran-prıin alyp, oǵan «Vıtebsktegi Slavıan bazary» HHH halyqaralyq óner festıvaliniń jabylý saltanatynda «Lıra» tabys etildi. Rýhııa Baıdúkenovanyń dıapazony – bes oktava.
2021 jyly Qostanaıda akademık Kenjeǵalı Saǵadıev eskertkishiniń ashylý saltanaty ótti, onyń qyzmetinde adamı kapıtaldy damytý men nyǵaıtýdyń eń mańyzdy sektory retinde bilim jáne ǵylym salasy mańyzdy oryn aldy. Ol óziniń ǵylymı mektebin qalyptastyrǵan, 445-ten astam ǵylymı eńbektiń, onyń ishinde 20 monografııa men oqýlyqtyń avtory, táýelsiz Qazaqstannyń bastaýshylarynyń biri.
2023 jyly Qasym-Jomart Toqaev «Ortalyq Azııa + Parsy shyǵanaǵy yntymaqtastyq keńesiniń» birinshi sammıtinde sóz sóıledi. Jahandyq azyq-túlik qaýipsizdigin nyǵaıtý maqsatynda Qasym-Jomart Toqaev osy saladaǵy yntymaqtastyqty keńeıtý úshin aýyl sharýashylyǵy mınıstrleriniń kezdesýi mehanızmin qurýdy usyndy. Sondaı-aq, Memleket basshysy Qazaqstannyń arab elderine aýyl sharýashylyǵy taýarlaryn eksporttaý kólemin ulǵaıtý jáne qurylymyn ártaraptandyrýǵa múddeli ekenin aıtty. Qazaqstan Prezıdenti Parsy shyǵanaǵy elderine qazaqstandyq eksportty shamamen 400 mıllıon dollarǵa 100 taýar pozıtsııasyna ulǵaıtýǵa daıyn ekenin málimdedi.
2023 jyly qazaqstandyq sportshy Nıkıta Chırıýkın Changvon qalasynda (Ońtústik Koreıa) oq atýdan jasóspirimder arasynda álem chempıony atandy, ulttyq qurama qorjynyna altyn medaldi saldy. Kishi kalıbrli tapanshadan 25 metrden atýda oǵan teń keler eshkim bolmady.
