19 maýsym – Áýe shabýylyna qarsy qorǵanys áskerleriniń kúni

ASTANA. KAZINFORM – QR Qarýly kúshterinde Áýe shabýylyna qarsy qorǵanys áskerleriniń qurylǵan kúni atap ótiledi. Bul týraly QR Qorǵanys mınıstrliginiń baspasóz qyzmeti málim etti. 

Bul ásker tegi Qorǵanys mınıstriniń 1992 jylǵy 19 maýsymdaǵy dırektıvasy negizinde qurylǵan bolatyn. Sol tusta áskerlerdiń quramyna Qazaqstan aýmaǵynda ornalasqan 37-shi áýe shabýylyna qarsy qorǵanys korpýsynyń zenıttik, zymyran, radıotehnıka jáne avıatsııa bólimderi, sondaı-aq áýe aılaqtyq-tehnıkalyq bólimsheleri, baılanys jáne radıotehnıkalyq qamtamasyz etý batalony kirdi. yptasýynyń basy-qasynda ár jyldary Halyq qaharmany armııa generaly Muhtar Altynbaev, avıatsııa general-maıory Anatolıı Vasımov, general-maıor Vladımır Bondarenko, general-leıtenant Oqas Saparov, general-maıor Nurjan Muqanov jáne basqa da áskerıler turdy. 1998 jyly Áýe qorǵanysy áskerleri Áýe qorǵanysy kúshteriniń quramyna kirdi.

Qazirgi ýaqytta bul ásker tegi Áýe shabýylyna qarsy qorǵanys áskerleriniń komandalyq pýnkti, quramyna zenıttik-zymyrandyq jáne radıotehnıkalyq bólimsheleri kiretin áýe shabýylyna qarsy qorǵanys brıgadalarynan turady.

«Áýe shabýylyna qarsy qorǵanys áskerleri elimizdiń ákimshilik-saıası, ónerkásiptik-ekonomıkalyq ortalyqtaryn áýeden qorǵaýdan bólek, áýe keńistigin paıdalaný tártibiniń saqtalýyn baqylap, áýe qarsylasyna qarsy kúres júrgizedi. Sonymen qatar Qurlyq áskerleriniń toptaryn, mańyzdy áskerı jáne basqa da obektilerdi qarsylastyń avıatsııalyq jáne ushqyshsyz ushý quraldarynyń soqqylarynan qorǵaýdy júzege asyrady», — delingen habarlamada. 

Beıbit ýaqytta Áýe shabýylyna qarsy qorǵanys áskerleri áýe keńistigin paıdalaný tártibiniń saqtalýyn úzdiksiz baqylaýdy júzege asyra otyryp, táýlik boıy jaýyngerlik kezekshilik atqarady.

Búgingi kúni Áýe shabýylyna qarsy qorǵanys áskerleri qarsylastyń zamanaýı áýeden shabýyldaý quraldaryn barlyq ushý bıiktikteri men jyldamdyqtary dıapazonynda der kezinde anyqtap, olarǵa soqqy bere alatyn zenıttik-zymyrandyq keshendermen jáne barlaý quraldarymen tolyqtaı jaraqtanǵan.

«Áskerlerdi joǵary tehnologııalyq qarý-jaraqpen jáne tehnıkamen jaraqtandyrý josparly túrde jalǵasýda. Áýe shabýylyna qarsy qorǵanys áskerlerine jańǵyrtylǵan S-300 zenıttik-zymyran keshenderi, qazirgi zamanǵy GM-403 «Nur» jáne Qazaqstannyń barlyq áýe keńistigin baqylaýǵa múmkindik beretin «Rosa» radıolokatsııalyq stantsııalary, sondaı-aq ortasha qashyqtyqtaǵy «BÝK-M2E» jáne qysqa qashyqtyqtaǵy «TOR-M» jańa zenıttik-zymyran keshenderi jetkizildi», - dep habarlady vedomstvonyń baspasóz qyzmeti. 

Búginde Áýe shabýylyna qorǵanys áskerleri úshin joǵary kásibı ofıtserlik kadrlardy daıyndaýdy Almaty qalasynda ornalasqan Radıoelektronıka jáne baılanys áskerı-ınjenerlik ınstıtýty júzege asyrady. Áskerı joǵary oqý ornynda jattyǵý keshenderi, tehnıkasy jáne qarý-jaraǵy bar jeke polıgon, sondaı-aq barlyq qajetti oqý-materıaldyq baza qalyptasqan.

Áýe shabýylyna qarsy qorǵanys áskerleriniń mamandary ózderiniń joǵary sheberlikterin TMD áýe qorǵanysynyń birikken júıesindegi «Jaýyngerlik dostastyq» jáne «Ashyq aspan» halyqaralyq oqý-jattyǵýlary barysynda birneshe ret dáleldedi.