1882 jyly Italııada shyqqan: Qazaqstandyqtar qandaı antıkvar qarýlardy tapsyrýda

ASTANA. QazAqparat – Qazaqstandyqtar «Lefashe», «Vetterlı-Vıtalı», «Moýzer S-96» syndy antıkvar qarýlar tapsyrdy. Bul týraly ІІM Ákimshilik polıtsııa komıteti Qarý aınalymyn baqylaý basqarmasynyń bastyǵy Asylbek Ydyrysov aıtty, dep habarlaıdy QazAqparat tilshisi.

«Antıkvarlyq jáne tarıhı qundylyǵy bar qarý krımınalıstıka bólimderiniń zattaı kollektsııalaryna nemese ІІM-niń murajaılaryna tapsyrylady. Bul rette olar atýǵa jaramsyz kúıge keltiriledi.

Aktsııa bastalǵan 2012 jyldan beri Shyǵys Qazaqstan oblysynda ekinshi dúnıejúzilik soǵys kezinen qalǵan tank pýlemeti, 2013 jyly Semeı qalasynda 1882 jyly Italııada shyǵarylǵan «Vetterlı-Vıtalı» vıntovkasy, «Lefashe» revolveri, 1936 jyly shyǵarylǵan kolıbri 6,5 mm-lik «Toz» oıyq uńǵyly tapanshasy tapsyryldy. Bıyl Atyraý qalasynyń turǵyny ózinen-ózi oqtalatyn 1896 jyly shyǵarylǵan «Moýzer S-96» nemis avtomatty tapanshasyn tapsyrdy», - dedi basqarmanyń bastyǵy mınıstrliktiń baspasóz alańynda ótken brıfıngte.

Asylbek Ydyrysovtyń atap ótýinshe, atalǵan qarýlardyń tarıhı qundylyǵyn komıssııa tekserip, qorytyndy shyǵarady.