18 sot oryndaýshy kollektorlarmen zańsyz baılanysy úshin lıtsenzııadan aıyryldy
«Birden aıta keteıin, 18 sot oryndaýshysy Ádilet mınıstrliginiń bastamasymen lıtsenzııasynan aıyryldy. Mınıstrlik zańbuzýshylyqtardy, olardyń kollektorlarmen zańsyz baılanysyn anyqtady. Bul sot isin júrgizýge jáne lıtsenzııadan aıyrýǵa negiz boldy. Shynynda da, mundaı ulasý bolmaýy kerek», - dedi vedomstvo basshysy Habar arnasyndaǵy «Ulttyq múdde» telebaǵdarlamasynda.
Onyń aıtýynsha, mınıstrlik sottyń oryndalýyn ári qaraı damytýdyń eki jolyn tańdady.
«Birinshi – ashyqtyqty qamtamasyz etý, onyń ishinde elektrondyq júıelerdi damytý. Ekinshi – sot oryndaýshylarynyń ózin-ózi retteýin damytý. Ashyqtyq týraly aıtatyn bolsaq, buryn aýktsıondar Ádilet mınıstrligi tańdaǵan alańda ótetin. Konkýrs ótedi, jeke kompanııa ony jeńip alady, úsh jylǵa aýktsıondy uıymdastyrýǵa kelisim jasalady. 2018 jyldan beri jeke alańdar tańdalmaıtyn boldy. Endi memlekettik elektrondyq júıe bazasyndaǵy aýktsıon alańy paıdalanylady jáne tyıym salynǵan múlikti satý týraly barlyq habarlandyrýlar jyljymaıtyn múlik pen avtomobılderdi satý boıynsha tanymal platformalarda qaıtalanady. Aýktsıonǵa qatysýshylar neǵurlym kóp bolsa, qatysýshylar tyıym salynǵan múlik úshin básekelestikte soǵurlym jaqsy baǵa beredi», - dep túsindirdi mınıstr.
Onyń aıtýynsha, qazir aýktsıondyq alymdar elektrondyq júıeniń odan ári damýyna jumsalmaı, ınvestıtsııalar úshin paıdalanylady.
«Osynyń arqasynda jeke sot oryndaýshylary úshin tıimdi elektrondyq júıeni qalyptastyrýǵa múmkindik týdy. ıAǵnı, qazir olar ártúrli bankterde boryshkerlerdiń aqsha týraly suraýlaryna birneshe kún jaýap kútpeıdi. Sanaýly mınýttarda bankterdiń elektrondy júıesi arqyly jaýap alady. Memlekettik málimetter bazasymen de dál solaı. Turaqty qarjylandyrýdyń arqasynda birneshe mınýt ishinde 20-dan astam elektrondyq júıeden aqparat ala alýǵa bolady. Bul fýnktsıonal aýktsıondyq alymdar esebinen tirkeldi. Ashyqtyq pen ózin-ózi retteýdi damytýǵa kelsek, jeke sot oryndaýshylar palatasy burynǵydan áldeqaıda tıimdi jumys isteýde. Palatanyń egjeı-tegjeıli bıýdjetin veb-saıttan kórýge bolady. Saıtta múshelik jarnanyń qashan engizilgeni, palatanyń barlyq qyzmetkerleriniń, onyń ishinde tóraǵanyń jalaqysyn da kórýge qoljetimdi», - dedi Marat Beketaev.
