18 aqpanda Astanada Tartyl Fest fınaly ótedi
Bul týrnır QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan. Joba ıdeıasyn belgili qazaqstandyq prodıýser Nurlan Qoıanbaev usynǵan, al jobanyń brend-elshisi – «Street Workout» boıynsha rekordsmen Aıtym Jaqypov.
Grand-fınalǵa óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 14-51 jas aralyǵynda.
Ótken jyly týrnıkke tartylýdan jarys Qazaqstannyń 20 qalasynda ótti. Onda 7 myńnan astam qazaqstandyq toǵyz salmaq dárejesinde saıysqa tústi. Tartylý sany boıynsha rekord 33 jastaǵy tarazdyq Evgenııge tıesili – ol 50 ret tartylǵan.
Nurlan Qoıanbaev Tartyl Fest respýblıkalyq týrnıriniń talanttardy izdeý men ózin-ózi tanytý múmkindigindegi mańyzyn atap ótti. Bul «DARA» qory uıymdastyrǵan alǵashqy joba jáne ol rasynda da halyqqa keń tarap, Memleket basshysynyń buqaralyq sportty damytý mindetterin iske asyrýdyń tabysty úlgisi boldy.
«Biz basqa salalarda da osyndaı otandastarymyzdyń túrli áleýmettik lıftilerdi paıdalanyp, óz talantyn júzege asyra alatyndaı alańdar qurýǵa nıettimiz», - dedi N. Qoıanbaev.
Tartyl Fest aqtyq saıysy 2023 jyldyń 18 aqpanynda EXPO aýmaǵyndaǵy Kongress ortalyqta saǵat 12.00-de bastalady. Jarys «Jibek Joly» telearnasynyń tikeleı efırinde kórsetiledi.
Grand-fınaldyń jalpy júlde qory – 54 mln teńge. Onda birinshi oryn jeńimpazy 3 mln teńge alady, ekinshi oryn úshin syıaqy - 2 mln teńgeni, úshinshi oryn úshin 1 mln teńgeni quraıdy.
Sonymen qatar frand-fınal chempıondary Street Workout boıynsha álem chempıonatynda Qazaqstan atynan saıysqa túse alady.
