17 jastaǵy Ámir Omarhanov alǵash ret Qazaqstan chempıonatynyń fınalyna ótti

ASTANA. KAZINFORM — Elordada eresekter arasynda tennısten ótip jatqan Qazaqstan chempıonatynda fınalǵa shyqqan oıynshylar anyqtaldy.

Erler arasynda týrnırdiń ekinshi raketkasy, álemdik ITF Juniors reıtıngisinde 23-orynda turǵan 17 jastaǵy Ámir Omarhanov jartylaı fınalda Islam Orynbasardy 6:2, 4:6, 6:3 esebimen utty.

Ámir Omarhanov eresekter arasynda Qazaqstan chempıonatynda alǵash ret altyn medal úshin talasatynyna qýanyshty ekendigin jetkizdi.

Ekinshi jartylaı fınalda ótken jylǵy chempıon Grıgorıı Lomakın asa tartysty matchta Tımýr Máýlenovti 7:6 (7:5), 7:6 (7:2) esebimen qapy qaldyrdy.

Áıelder arasynda chempıonattyń birinshi raketkasy Jibek Qulambaeva óziniń favorıt ekendigin dáleldep, 18 jastaǵy Іńkár Dúısebaıdan aılasyn asyrdy — 6:1, 6:3.

Ekinshi jartylaı fınalda Arýjan Saǵyndyqova Polına Sleptsovany joldan taıdyrdy — 6:3, 6:2.

— El chempıonatynyń fınalyna shyqqanyma óte qýanyshtymyn. Jibekpen matchtyń ońaıǵa túspeıtinin jaqsy bilemin. Ol — tájirıbeli oıynshy, kóp jyldan beri joǵary deńgeıde óner kórsetip keledi. Degenmen men de qarap qalmaımyn. Mundaı básekeler sheberligimizdi shyńdaıdy, — dedi Arýjan Saǵyndyqova.

Eske sala keteıik, budan buryn tennısten Qazaqstan chempıonatynda Polına Sleptsovanyń Sandýǵash Kenjebaevany jeńip ketkenin jazǵan edik.