17 naýryz. Tulǵalar týǵan kún
Búgin, 17 naýryz kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.
ESІMDER
50 jyl buryn (1976) mamandandyrylǵan aýdanaralyq ekonomıkalyq sotynyń sýdıasy Berik Seıitjanuly KÁRІM dúnıege keldi.
Shymkent qalasynda týǵan. Qaraǵandydaǵy ІІM-niń joǵarǵy mektebin bitirgen.
Eńbek jolyn 1997 jyldan quqyq qorǵaý organdarynda tergeý salasynda bastaǵan. Sot júıesindegi qyzmetin 2007 jyly Shymkent qalasy Eńbekshi aýdandyq sotynyń sýdıasy bolyp bastaǵan. 2013-2018 jyldary Tólebı aýdandyq sotynyń tóraǵasy, 2018-2024 jyldary Shymkent garnızony áskerı sotynyń tóraǵasy boldy.
Qazirgi qyzmetin 2024 jyldyń sáýir aıynan beri atqaryp keledi.
36 jyl buryn (1990) qazaqstandyq dırıjer, dombyrashy, kúıshi, «Daryn» memlekettik jastar syılyǵynyń laýreaty, Qurmanǵazy atyndaǵy Qazaq memlekettik akademııalyq halyq aspaptar orkestriniń bas dırıjeri Abylaı Janbolatuly TІLEPBERGENOV dúnıege keldi.
Mańǵystaý oblysynyń Aqtaý qalasynda týǵan. 2010 jyly Mańǵystaý óner kolledjiniń halyq aspaptar bólimin, 2014 jyly Qurmanǵazy atyndaǵy Qazaq ulttyq konservatorııasyn, 2016 jyly sol oqý ornynda magıstratýrany bitirdi.
Dombyra nomınatsııasy boıynsha respýblıkalyq jáne halyqaralyq baıqaýlardyń birneshe dúrkin jeńimpazy, konservatorııanyń mádenı is-sharalarynyń belsendi qatysýshysy, kontserttik toppen Qazaqstandy jáne alys shetelderge: Germanııa, Frantsııa, Chehoslovakııa, Iordanııa, Birikken Arab Ámirlikteri jáne TMD elderine saıahattaǵan. Abylaı Tilepbergenniń repertýarynda halyq jáne qazirgi zaman kompozıtorlary Qurmanǵazy, Dına, Dáýletkereı, Súgir, Táttimbet, Tilendıev, Ahmedııarov jáne basqa da kóptegen orys jáne shetel klassıkteriniń shyǵarmalary bar.
Qazirgi qyzmetin 2018 jyldyń qazan aıynan beri atqaryp keledi.
105 jyl buryn (1921-2011) qazaqtan shyqqan tuńǵysh kásibı kınorejısser áıel, Qazaq KSR-iniń eńbek sińirgen óner qaıratkeri Darıǵa Baıjumanqyzy TІNÁLINA dúnıege kelgen.
Aqmola oblysy Vıshnevka aýdanynda (qazirgi Arshaly aýdany) týǵan. Almaty teatr ýchılışesin, Búkilodaqtyq memleketik kınematografıster ınstıtýtynyń rejısserlik fakýltetin bitirgen.
Eńbek jolyn akterlikten bastaǵan ol «Aq roza», «Abaı ánderi», «Jambyl», «Romantıkter», «Úkimet múshesi», «Alyp týraly án» kórkem fılmderindegi epızodtarda oınady. 1953 jyldan bastap rejısser retinde jumys istep, «Qazaqstan keńistiginde» atty ǵylymı-tanymdyq fılmdi túsirdi.
1954-1958 jyldary «Mosfılm» stýdııasynyń rejısseri bolyp, «Saltanat», «Ilıa Mýromets», «Erekshe tapsyrma», «Alystaǵy taýda» atty kórkem fılmderdiń túsirilýine qatysty.
1964 jyldan «Qazaqfılm» stýdııasynyń rejısseri retinde «Qorytpa», «Ázil-shyny aralas», «Ǵasyrlar pernesi», t. b. kórkem jáne hronıkalyq-derekti fılmderdiń qoıylýyna uıytqy boldy.
2009 jyly «Ekran sheberi» ataǵyna ıe boldy. «Cherno-beloe kıno» atty monografııalyq kitaptyń avtory.
88 jyl buryn (1938-2011) fılologııa ǵylymynyń doktory, professor, Qazaqstan Respýblıkasy bilim berý isiniń úzdigi Myrzataı Serǵalıuly SERǴALIEV dúnıege kelgen.
Soltústik Qazaqstan oblysynyń Shal aqyn aýdanynda týǵan. Qazaq memlekettik ýnıversıtetiniń fılologııa fakýltetin bitirgen.
1987-1992 jyldary Qazaq KSR Ǵylym akademııasy Til bilimi ınstıtýtynyń kishi ǵylymı qyzmetkeri, Qazaq memlekettik ýnıversıteti fılologııa kafedrasynyń aǵa oqytýshysy, meńgerýshisi, fılologııa fakýltetiniń dekany bolǵan.
Merzimdi jáne ádebı baspasóz betterinde, sondaı-aq «Ýaqyt jáne qalamger», «Sózstan», «Sóz óneri», «Jazýshy jáne sóz mádenıeti», «M.Áýezovtiń qazaq tilin damytýdaǵy róli», «Muhtar murasy», «S.Muqanovtyń ádebı-mádenı murasy jáne qazirgi zaman. II tom», t. b. ujymdyq jınaqtarda qazirgi ádebı protseske, kórkem ádebı tilge qatysty maqalalary men baıandamalary jaryq kórgen.
Kórkem aýdarma salasynda ıA.Kamaldyń, K.Vırhtyń, M.Zárábtyń, K.Dýgaldyń, B.Balajdyń, Á.Qadyrovtyń, V.Kojevnıkovtyń, V.Latsıstyń áńgimelerin qazaq tiline aýdarǵan.