17 aqpan. Jylnama
Kazinform oqyrman nazaryna 17 aqpanǵa arnalǵan ataýly kúnder men este qalar oqıǵalar kúntizbesin usynady.
ATAÝLY KÚNDER
Rııasyz meıirim kórsetý kúni
Bul meıramdy azamattyǵyna, ultyna, dinı senimderine qaramastan búkil adamzat atap ótýge bolady. Bul kúni, uıymdastyrýshylardyń aıtýy boıynsha, aınaladaǵylardyń bárine sheksiz meıirimdi bolýǵa tyrysý kerek.
ESTE QALAR OQIǴALAR
2005 jyly Parlament Senatynyń halyqaralyq qatynastar komıtetiniń tóraǵasy, tanymal memleket qaıratkeri Qýanysh Sultanov Eýropalyq qaýipsizdik jáne yntymaqtastyq uıymy aıasyndaǵy «Danalar keńesiniń» múshesi boldy. «Danalar keńesine» Vankýverden Vladıvostokqa deıin EQYU qyzmet etetin barlyq aımaqtyń ókilderi kiredi.
2009 jyly QR Prezıdentiniń Jarlyǵymen Qazaqstan Respýblıkasynyń syrtqy barlaý qyzmeti – «Syrbar» quryldy. Jarlyqta atap ótilgendeı, QR-nyń 2007-2012 jyldary Ulttyq qaýipsizdigi strategııasyn iske asyrý, ulttyq qaýipsizdikti nyǵaıtý jáne Qazaqstannyń arnaıy qyzmetter qurylymyn jandandyrý maqsatynda Qazaqstan Respýblıkasynyń «Syrbar» syrtqy barlaý qyzmeti quryldy. Memlekettik organ retinde ol tikeleı Qazaqstan Respýblıkasynyń Prezıdentine baǵynyp, esep beredi. Atalǵan Jarlyqqa sáıkes, sondaı-aq Qazaqstan Respýblıkasy Ulttyq qaýipsizdik komıtetiniń «Barlaý» qyzmeti taratyldy.
2013 jyly qazaqstandyq operator Ázız Jambakıev «Ýrokı garmonıı» fılmi úshin Berlın kınofestıvaliniń júldesine ıe boldy. Bul áıgili Berlın kınofestıvalinde qazaqstandyq kınogerlerdiń alǵan alǵashqy júldesi edi.
2016 jyly Astanadaǵy Qazaq ulttyq óner ýnıversıtetinde Sh. Aımanov atyndaǵy «Qazaqfılm» AQ túsirgen tolyqmetrajdy «Saǵadat Nurmaǵambetov. «Sońǵy suhbat» atty derekti fılminiń kórsetilimi ótti. Týyndy Keńes Odaǵynyń Batyry, Qazaqstannyń Halyq Qaharmany, Qazaqstan Respýblıkasynyń tuńǵysh Qorǵanys mınıstri, armııa generalynyń ómirinen syr shertedi.
2017 jyly Astanada 10 jastaǵy Aımen Nurjan EKSPO-2017 kórmesi qonaqtary men kelýshilerine yńǵaıly bolýy úshin «EKSPO-gıd» mobıldi qosymshasyn ázirledi. Onda halyqaralyq kórmege qatysýshy elderdiń pavılondary geolokatsııamen kórsetilgen. Qosymsha kómegimen kez kelgen adam kórmeniń qaı pavılonyna qalaı barý qajettigin bilip qana qoımaı, meıramhanalar, taksı men avtobýstar, anyqtama bıýrosy qyzmet túrlerin de ala alady.
2018 jyly Túrkııanyń Kastamoný qalasynda TÚRKSOI-ǵa múshe elder ókilderiniń qatysýymen ótken 2017 jyldy qorytyndylaý jıynynda túrkitildes elderdiń rýhanı ómirine úles qosqan birqatar azamattardyń esimderi úzdikter qatarynda ataldy. TÚRKSOI uıymynyń jáne baýyrlas memleketterdiń ózara yntymaqtastyǵy men birligin nasıhattaýǵa erekshe eńbegi sińgen Qazaqstan, Qyrǵyzstan, Tatarstan, Bashqurtstan, Gagaýzııa, Soltústik Kıpr, Bolgarııa, Makedonııa, Túrkııa elderiniń aqyn-jazýshylary men jýrnalısterine «Baspasóz syılyǵy» men arnaıy dıplomdar, baǵaly syılyqtar tabystaldy. Marapattalǵandardyń arasynda Ońtústik Qazaqstan oblysy mədenıet jəne halyq shyǵarmashylyǵy ortalyǵynyń redaktory Mádına Áıtpenbetova men Kazinform halyqaralyq aqparattyq agenttiginiń redaktory Janar Muhamedııarova da bar.
2021 jyly qazaqstandyq Taýfık Kárimov Halyqaralyq London premııasynyń laýreaty atandy. Jazýshy «Juldyzdar» atalymynda «Shaǵyn proza» nomınatsııasy boıynsha Charlz Dıkkens syılyǵyn ıelendi. Onyń baıqaýǵa qatysqan týyndysy – aǵylshyn jáne orys tilderinde jaryq kórgen «Fata Morgana» kitaby. Halyqaralyq London syılyǵyn uıymdastyrýshylardyń arqasynda ár eldiń 500-den astam aqyn-jazýshysy álemdik arenaǵa shyǵyp, ózin sheteldik aýdıtorııaǵa tanyta aldy.
2022 jyly «Shema» fılmi 72-shi halyqaralyq Berlın kınofestıvaliniń Generation konkýrstyq baǵdarlamasynda (balalar men jasóspirimder týraly fılmderge arnalǵan) Gran-prı jeńip aldy. Marapatty fılm rejısseri Farhat Sharıpov aldy. Kúrdeli taqyrypta túsirilgen kınotýyndynyń jelisi kastıngke kelgen jasóspirimderdiń jeke oqıǵalaryna negizdelgen. Basty róldi debıýtant akterler Vıktorııa Romanova men Taır Svıntsov oınady. Qoıýshy-operator Aleksandr Plotnıkov, qoıýshy-sýretshi Alekseı Shındın boldy. Prodıýseri –Dına Jumabek.
2022 jyly Kókshetaý qalasynyń NIS oqýshysy Aılana Ómirzaq (4-synyp) ««Ekodorba» taqyrybyndaǵy ǵylymı jumysy boıynsha avtorlyq quqyqqa ıe boldy. Jas ǵalym qorshaǵan ortany zııandy zattardan saqtaý maqsatynda ekoqapshyqtar oılap tapqan. Jobanyń artyqshylyǵy – qapshyqtar yńǵaıly, berik, eń bastysy, ekologııaǵa zııany joq jáne bul ónimdi turmysta da keńinen paıdalanýǵa bolady.
2023 jyly Almaty ákimi Erbolat Dosaev Naýryzbaı aýdanynyń turǵyndarymen kezdesýinde azyq-túlik baǵasynyń ósýin tejeý sharalary týraly aıtty. Áleýmettik mańyzy bar ónimderdiń baǵasyn shekteý jumystary 2022 jyldyń kúzinde bastaldy. Bul maqsattarǵa ákimdik 15 mlrd teńge bóldi. Іri jeliler jetkizýshilermen tikeleı jumys isteı bastady, sondyqtan baǵalar tómendedi.
