165 astanalyq «Elbasy medalimen» marapattaldy
Jastardy marapattaý rásimi Oqýshylar saraıynda ótti.
Aıta ketsek, «Elbasy medali» - elimizdegi eń aýqymdy challenge, oǵan qatysýǵa 14 pen 29 jas aralyǵyndaǵy jastar shaqyrylady. Qatysýshylar qola, kúmis nemese altyn deńgeıdi tańdap, 6 aıdan 18 aıǵa deıingi baǵdarlama talaptaryn oryndaýy kerek. Osy ýaqyt aralyǵynda olar óz daǵdylaryn 7 baǵytta damytady: sport, daryn men daǵdy, kitap oqý, ulttyq mura, eriktilik, týrıstik saıahattar jáne eńbek tájirıbesi.
«Elbasy medali» jobasyna qatysyp, bul keremet tájirıbe bolatynyn jaqsy túsindim, biraq jobaǵa qatysý meniń ómirime qanshalyqty áser etetinin elestete almadym. Jobada men «Eriktilik», «Kitap oqý», «Daryn men daǵdy» baǵyttary boıynsha alǵa qoıǵan maqsatyma qol jetkizdim. Jobaǵa alǵysym sheksiz! Jańa qyrlarymdy ashtym, buǵan deıin aınalysqan qyzyǵýshylyqtaryma jańasha kózqaras paıda boldy. Eń bastysy men jańa dostar taptym! Olardyń barlyǵy belsendi, qyzyqty, ıdeıalyq jáne jarqyn jandar», - dedi óz áserimen bólisken joba qatysýshysy Jaras Jeńisov.
2020 jyly «Elbasy medali» baǵdarlamasy elimizdiń barlyq óńirlerinen 11 myńnan astam qatysýshyny qamtydy, qatysýshylardyń jalpy sanynyń 23% aýyl balalary. 3 535 adam qola deńgeıin sátti aıaqtady.
«Jobaǵa qatysý barysynda men bolashaqta qajet bolatyn tájirıbe alyp úlgerdim! Eriktilik baǵyty erekshe oryn aldy. Sebebi buǵan deıin men bul salamen kezdespegen edim, endi basqalarǵa turaqty túrde qalaı kómektesýge bolatynyn bilemin. Qurmetti Elbasyna jastarǵa arnalǵan osyndaı bastama úshin zor alǵysymdy bildiremin», - dedi joba qatysýshysy Altynbek Ábilda.
Ata-analar da óz áserlerimen bólisti: «Meniń qyzym Nurmetova Nargız, 14 jasta, 6 aı ishinde ol «Jyl eriktisi» halyqaralyq baıqaýyna qatysty, BUU Qory uıymdastyrǵan «COVID-19-ǵa qarsy kúresken áıelder» fotokórmesindegi keıipkerlerdiń biri boldy, «Qarjylyq saýattylyq», «Tsıfrlyq saýattylyq», «Mobılografııa» jáne t. b. onlaın-kýrstardan ótti. Qatysýshylardyń ata-analary atynan qurmetti Elbasyna balalarymyzǵa osyndaı múmkindik bergeni úshin zor alǵysymdy bildiremin!», - dedi Zýhra Nurmetova.
