16 jastaǵy qazaqstandyq ánshi AQSh-taǵy halyqaralyq vokalıster baıqaýynda jeńimpaz atandy
ALMATY. KAZINFORM – 16 jastaǵy qazaqstandyq oryndaýshy Adelına Muhametjanova amerıkalyq tyńdarmandardyń júregin jaýlap aldy. Jaqynda ol Latıf Hamıdıdiń «Bulbul» shyǵarmasymen AQSh-ta ótken halyqaralyq vokaldyq baıqaýda jeńimpaz atandy.
Ánshiniń PR menedjeri Tatıana Sınenkonyń aıtýynsha, 16 jastaǵy Adelına Muhametjanova AQSh-taǵy Mınnesota shtatyndaǵy mektepke 2022 jyly qabyldanǵannan keıin, búkil Amerıkadaǵy 9 vokaldyq konkýrsqa qatysyp, kóbinde júldeli oryndarǵa ıe bolyp keledi.
Ótken demalys kúnderi aqtyq synǵa shyqqandardy anyqtaǵan «Radda Rise International Piano and Vocal Competition» halyqaralyq baıqaýy da osy tabystardyń qatarynan tabylyp, bul baıqaýda da Adelına qazylar alqasynyń biraýyzdy sheshimimen Latıf Hamıdıdiń «Bulbul» kompozıtsııasymen birinshi orynǵa ıe boldy.
«Adelına — vırtýozdy oryndaýshy jáne men onyń tehnıkalyq jaǵynan óte kúrdeli kompozıtsııany tańdap, árqaısymyzǵa esten ketpesteı áser syılady degenime barshanyń kelisetine senemin. Mende bul ánniń ne týraly ekendigi jaıly múlde túsinik joq. Biraq, ol meni árbir notany sezinýge májbúrledi. «Bulbul» taǵy da jáne taǵy da oryndalýy tıis», — dedi Qazylar alqasynyń múshesi, bedeldi Saint Thomas Choir School vokaldyq oqytýshysy, Manhattan School of Music Precollege vokal fakýltetiniń múshesi Djýzeppe Spoletını.
Adelına básekelesteriniń óte myqty bolǵanyn jetkizdi.
«Baıqaýǵa men 3 kompozıtsııa usyndym, jáne qazaqtyń akademııalyq klassıgine iltıpat bildirilip, osyndaı jyly lebizder estigenime óte qýanyshtymyn. Oǵan qosa meniń básekelesterim óte myqty boldy: 3-oryn amerıkandyq óner jáne mýzyka salasyndaǵy eń iri joǵary oqý oryndarynyń biri The Julliard School stýdentine berilgenin bilemin. Árıne, osyndaı jeńis budan da kóp eńbektenýge qulshyndyrady», — deıdi Adelına.
Aıta keteıik, Adelına Muhametjanova 7 jyldan astam ýaqyttan beri akademııalyq vokal boıynsha bilim alyp keledi, onyń ustazy — Qurmanǵazy atyndaǵy Qazaq Ulttyq konservatorııasynyń «Vokal óneri» kafedrasynyń dotsenti Gúlnar Nurǵalıeva.
