1,6-2 mln teńge: elde eń joǵary jalaqy kimge usynylady
ASTANA. KAZINFORM — Naýryzdaǵy kórsetkishpen salystyrǵanda bos jumys oryndarynyń sany 2,1%-ǵa ósse, túıindeme sany 15,1%-ǵa artqan.
2026 jylǵy sáýirde Enbek.kz Elektrondyq eńbek bırjasynda jumys berýshiler 104,7 myń bos jumys ornyn jarııalady, al jumys izdeýshiler tarapynan 123,3 myń túıindeme ornalastyryldy.
Salalyq qurylym boıynsha kadrlarǵa eń kóp suranys bilim berý salasynda tirkeldi, ıaǵnı 20,2 myń bos jumys orny. Sonymen qatar ózge de qyzmet túrlerin kórsetý salasynda — 15,5 myń, aýyl, orman jáne balyq sharýashylyǵynda — 10,7 myń, óńdeý ónerkásibinde — 9,5 myń, densaýlyq saqtaý jáne halyqqa áleýmettik qyzmet kórsetý salasynda 9,4 myń vakansııa jarııalanǵan.
Óńirler boıynsha eń kóp bos jumys oryndary Astana qalasy (8,5 myń), Pavlodar oblysy (7,2 myń), Almaty qalasy (6,7 myń), Aqmola oblysy (6,6 myń) jáne Qaraǵandy oblysynda (6,4 myń) ornalastyryldy.
Biliktilik deńgeıi boıynsha suranystyń kóp bóligi orta bilikti mamandarǵa tıesili, ıaǵnı barlyq vakansııanyń shamamen 46%-y atalǵan sanatqa saı. Joǵary bilikti mamandarǵa suranys 27% bolsa, tómen bilikti kadrlar da vakansııalardyń 27%.
Jumys izdeýshiler arasynda 35 jasqa deıingi úmitkerler basym, ıaǵnı barlyq túıindemeniń 39%-yn quraıdy. 35–44 jas aralyǵyndaǵy úmitkerlerdiń úlesi — 28%, 45–54 jas aralyǵy — 20%, al 55 jastan asqandar — 13%. Jynysy boıynsha: 53% — áıelder, 47% — erler.
Biliktilik deńgeıi boıynsha jumys kúshiniń usynys qurylymy jalpy alǵanda suranys qurylymymen sáıkes keledi: túıindemelerdiń 42%-y orta biliktilik deńgeıindegi mamandarǵa tıesili, 31%-y — joǵary bilikti, al 27%-y — tómen bilikti jumys izdeýshiler.
Sáýirde ushqysh mamandyǵy birden eki kórsetkish boıynsha kósh bastady: jumys berýshiler shamamen 1,9 mln teńge kóleminde eńbekaqy usynsa, jumys izdeýshilerdiń kútken jalaqysy 3,9 mln teńge boldy. Joǵary eńbekaqy usynylǵan basqa da vakansııalardyń qatarynda baǵdarlamalyq qamtamasyz etý sáýletshisi (≈1,7 mln teńge) jáne jabdyqtardy synaý jónindegi basshy (≈1,6 mln teńge) bar. Al joǵary jalaqy kútetin úmitkerler arasynda bortserikter (≈2,1 mln teńge) men jaq-bet hırýrgi mamandary (≈2 mln teńge) erekshelendi.
2026 jyldyń basynan beri platformada 409 myń bos jumys orny jáne 517,7 myń túıindeme jarııalanǵan.
Aıta ketelik Úkimette ózin-ózi jumyspen qamtyǵan azamattardyń áleýmettik tólem máselesi talqylandy.
