15 jylda Travmatologııa jáne ortopedııa ǴZI-da 126 myńnan astam adam emdeldi
Ortalyq aýdandyq, qalalyq jáne oblystyq aýrýhanalar deńgeıinde súıek-bulshyqet júıesi zaqymdalǵan, termııalyq jáne hımııalyq kúıikke shaldyqqan aýrýlardy qaraý jáne emdeý standarttary ázirlendi. Travmatologııa, ortopedııa, termııalyq jaraqat, jaq-bet jaraqaty, polıtravma, neırotravma, jan saqtaý, mıkrohırýrgııa, revmatologııa jáne ońaltý boıynsha dıagnostıkalaý men emdeýdiń 45 medıtsınalyq-ekonomıkalyq hattamalary jasaldy.
2006 jyldan beri ınstıtýtta iri býyndarǵa osteosıntez, artroskopııa, endoprotezdeý jasaıtyn zamanaýı aýdıo- jáne beınejúıemen, quraldarmen jáne mýlıajdarmen jabdyqtalǵan mamandardy dıpplomnan keıin daıyndaý ortalyǵy jumys jasaıdy. TOǴZI turaqty túrde jaqyn jáne alys shetelden jetekshi mamandardy shaqyrýmen sheberlik klastaryn, semınar-trenıngter, konferentsııalar ótkizip turady.
2014 jyly ınstıtýttyń bazasynda Іri býyndardy endoprotezdeý respýblıkalyq ortalyǵy ashyldy. Kishiınvazıvtik jáne revızııalyq endoprotezdeý, urshyq jáne tizebýyndardyń onkoprotezderi engizildi.
Qazirgi kezde TOǴZI-da urshyqbýyn endoproteziniń álemdik óndirisiniń 30 modeli synaqtan ótip engizildi, iri býyndardyń 7500 endoprotezi qoıyldy. Belgili modeldermen qatar ınstıtýtta N.Batpenovtyń tsementsiz bekitetin urshyqbýyn endoproteziniń modeli qoldanýda. Bul protezderdiń shyǵarylýy Germanııada K-Implant kompanııasymen júzege asyrylady.
2015 jyly TOǴZI ujymy urshyqbýyn hırýrgııasynda endoprotezdeýdi qoldanýda ınnovatsııalyq tehnologııalardy jasap engizýge arnalǵan jumystardyń toptamasy úshin ǵylym men tehnıka salasyndaǵy al-Farabı atyndaǵy memlekettik syılyqqa ıe boldy.
2006 jyly TOǴZI-da respýblıkada alǵash ret Artroskopııa jáne sporttyq jaraqat bólimshesi quryldy, al 2014 jyly onyń bazasynda Artroskopııa jáne sporttyq jaraqat ortalyǵy ashyldy. Onda jyl saıyn iri býyndarǵa 1500 astam artroskopııalyq aralasýlar oryndalady.
Granttyq qarjylandyrý sheńberinde tizebýyn shemirshegi patologııasynda, súıek tini aqaýynda jasýshalyq tehnologııalar ázirlenýde.
Jeke jáne kóptegen jaraqaty bar aýrýlardy emdeýde osteosıntezdiń kishiınvazıvtik ádisteri aýrýlar statsıonarǵa túsken bir saǵat ishinde jasalady. Bul buǵanasy, bilegi, tobyǵy synǵan aýrýlardy statsıonarlyq emdeý merzimin 5 kúnge deıin qysqartýǵa, gıpstik ımmobılızatsııalaýdy boldyrmaýǵa jáne ońaltýdy erterek bastaýǵa múmkindik beredi.
Birqatar ǵylymı-tehnıkalyq baǵdarlamalardy iske asyrý sheńberinde emdeýdiń joǵarytehnologııalyq ádisterin engizýmen qatar TOǴZI qyzmetkerleri aıaq-qol súıekteri synǵanda osteosıntez jasaý úshin jańa konstýktsııalardy, ımplanttardy jetildirip ázirledi. Olar alǵash ret qazaqstandyq zaýytta shyǵaryldy.
Búgingi kúni ınstıtýt jaqyn jáne alys sheteldiń 25 jetekshi travmatologııa jáne ortopedııa ortalyqtarymen qarym-qatynasta. Sonyń arqasynda AQSh, Ispanııa, Avstrııa, Shveıtsarııa jáne Germanııada ótkiziletin dıagnostıkalaý men emdeýdiń zamanaýı tehnologııalarǵa úıretetin trenıngter men semınarlarda ınstıtýttyń mamandary men ǵylymı kadrlarynyń daıyndyǵy júrgiziledi. Osy jyldary Eýropa men AQSh-tyń úzdik klınıkalary bazasynda 100-ge jýyq maman oqytyldy.