15 shilde. Jylnama
Kazinform oqyrman nazaryna 15 shildege arnalǵan ataýly kúnder men este qalar oqıǵalar kúntizbesin usynady.
ESTE QALAR OQIǴALAR
1992 jyly Qazaqstan Respýblıkasy men Rýmynııa arasynda dıplomatııalyq qarym-qatynas ornady.
1999 jyly QR Prezıdentiniń Jarlyǵyna sáıkes, Almaty oblysynyń Talǵar qalasy aýdandyq mańyzdaǵy qalalar sanatyna engizildi. Ákimshilik ortalyǵy — Talǵar qalasy, ol oblys ortalyǵy Taldyqorǵan qalasynan 274 km, Almaty qalasynan 25 km qashyqta jatyr.
1999 jyly Tretıakov galereıasynda (Máskeý) qazaqstandyq sýretshi, Salvador Dalı atyndaǵy halyqaralyq syılyqtyń ıegeri Erbolat Tólepbaıdyń jeke kórmesi ótti.
Erbolat Tólepbaı — Máskeýdiń memlekettik Tretıakov galereıasynda óziniń jeke kórmesin ótkizgen tuńǵysh qazaqstandyq sýretshi. Ol sýret ónerindegi erekshe jetistigi úshin Salvador Dalı atyndaǵy halyqaralyq alıans syılyǵyn (Madrıd — Praga, 2002 j.), EUROUNION joǵary marapatyn (Brıýssel, 2001 j.) ıelengen. Onyń eńbegi sıýrrealızm ǵulamasy Salvadora Dalıdyń 100 jyldyǵyna arnalǵan birlesken jumystar aıasynda Frantsııanyń Parıjinde qoıylǵan.
2009 jyly Qazaqstanda halyqaralyq Eýro-2 tehnıkalyq jáne ekologııalyq standarty engizildi.
2010 jyly Pavlodar aýdany Grıgorevka aýylynyń mýzeıi jańa eksponatpen tolyqty. Balyqshylar Ertis ózeninen ejelde ómir súrgen mamonttyń bir metrden asatyn azý tisin taýyp aldy. Qazaqstandaǵy úzdik mektep mýzeıi dep tanylǵan mýzeıde Qazaq dalasyn mekendegen ejelgi janýarlardyń súıekteri bar. Osydan elý jyldaı buryn Ertis ózeni osy aýyldyń janynan aǵyp ótetin tusyndaǵy arnasyn ózgertken bolatyn. Sodan beri arheologtar osy mańnan ejelgi janýarlardyń súıekterin taýyp júr.
2010 jyly «QazMunaıGaz» UK» AQ men «Shell Kazahstan Development B.V.» kompanııasy Soltústik-Kaspıı jobasy aıasynda aktsıonerler kelisimine qol qoıdy. Oǵan sáıkes, «QMG» «Shell» kompanııasymen teńdeı sharttar negizinde NC Production Operations Company B.V. (NCPOC) kompanııasyna kirdi.
2014 jyly Arqalyq pedagogıkalyq ınstıtýtynyń professory Ábilhan Úmbetov fızıka salasyndaǵy ónertabystardy damytýǵa qosqan úlesi úshin Reseı tabıǵattaný akademııasynyń Nobel altyn medalin aldy. Medal «Lazerli ólsheý quraly» ǵylymı-zertteý jumysyna berildi.
2018 jyly Fızıka-matematıka baǵytyndaǵy NZM oqýshysy Nurdáýlet Taýmergenov «Yakutsk International Science Fair» atty oqýshylar arasynda ótken Halyqaralyq ǵylymı-konferentsııa baıqaýynda gran-prı jeńip aldy. Oqýshy ymmen jetkizilgen sózderdi GloveSpeaker qolǵaby arqyly aýyzeki sóıleý tiline aýdarýǵa arnalǵan jobany tanystyrdy. Onyń oılap tapqan týyndysy mylqaý adamdarmen qıyndyqsyz túsinisýge múmkindik beredi. Sıngapýr ulttyq ýnıversıtetiniń professory, Halyqaralyq zııatkerlik oıyndardyń baǵdarlamalyq komıteti tóraǵasy Leon Chýan Kvek jáne «Maıtona» kompanııasynyń prezıdenti Aleksandra Baısheva jeńimpazǵa 5 myń AQSh dollarynyń arnaıy sertıfıkatyn tabys etti.
2018 jyly Kalatýra qalasynda (Shrı-Lanka) 7-17 jastaǵy mektep oqýshylary arasynda shahmattan 14-shi Azııa chempıonaty ótti. Oǵan álemniń 16 elinen 400-den astam jas daryn ıeleri qatysty. Onda toǵyz jasar atyraýlyq Zarına Nurǵalıeva rapıd jáne blıts boıynsha altyn medal ıelendi.
2019 jyly qazaqstandyq ánshi Ádilhan Makın Vıtebskte ótken «Slavıan bazary-2019» estrada ánderin oryndaýshylardyń XXVIII Halyqaralyq baıqaýynda Gran-prıge ıe boldy. Qazaq ánshisi eki kúnniń qorytyndysy boıynsha 178 bal jınady.
2021 jyly Chehııada para jeńil atletıkadan halyqaralyq ashyq týrnır aıaqtaldy. Qazaqstannyń atynan ıadro laqtyrý, uzyndyqqa sekirý, naıza jáne dısk laqtyrý, júgirý qashyqtyqtary tártipteri boıynsha 9 sportshy qatysyp, 18 medal jeńip aldy. Qazaqstandyq paralımpıadashylar týrnırden 18 medal ıelendi. Ulttyq quramanyń qorjynynda 5 altyn, 6 kúmis, 7 qola medal bar.
2022 jyly Qazaqstan tarıhynda alǵash ret elimizdiń tórt tóreshisi «Úlken dýlyǵa» týrnırine qazylyq etti. Qazaqstan tennıs federatsııasynan málim etkenindeı, Merýert Kaýkeeva (Taldyqorǵan), ıÝlııa Ignatchenko (Almaty), Borıs Kravchýk (Qostanaı) jáne Vladlena Samenkova (Aqtóbe) Ýımbldon jarysynda tórelik jasap, deńgeıleriniń joǵary ekendigin kórsete bildi.
2023 jyly Almatyda Qazaq kóz aýrýlary ǴZI men Datsın kóz aýrýhanasy birlesken ǵylymı zertteý jobalaryn júrgizýge múmkindik beretin Ózara túsinistik týraly memorandýmǵa qol qoıdy. Memorandýmnyń maqsaty — bilim berý jáne ǵylymı-zertteý qyzmetindegi strategııalyq áriptestikti damytý.
