14 shilde. Jylnama
Kazinform oqyrman nazaryna 14 shildege arnalǵan ataýly kúnder men este qalar oqıǵalar kúntizbesin usynady.
ATAÝLY KÚNDER
Qazaqstanda balyq sharýashylyǵy qyzmetkerleri kúni
2017 jyly resmı túrde bekitilgen. «Qazaqstan Respýblıkasyndaǵy merekeler týraly» 2001 jylǵy 13 jeltoqsandaǵy Qazaqstan Respýblıkasy Zańynyń 4-babyna sáıkes Qazaqstan Respýblıkasynyń Úkimeti Balyq sharýashylyǵy qyzmetkerleriniń kúnin atap ótý týraly sheshim qabyldady.
Bul merekede balyq sharýashylyǵy qyzmetkerlerinen, kásipqoı ózen jáne teńiz balyq aýlaýshylardan, sporttyq balyqshylardan, jazǵy-qysqy balyq aýlaý áýesqoılarynan quttyqtaýlar qabyldanady.
Notarıýs kúni
Qazaqstan Respýblıkasynda notarıýstyń mártebesin arttyrý maqsatynda «Kásibı merekelerdiń tizbesin bekitý týraly» Premer-Mınıstrdiń orynbasary — Eńbek jáne halyqty áleýmettik qorǵaý mınıstriniń 2023 jylǵy 29 maýsymdaǵy № 258 buıryǵyna sáıkes, 14 shildede jyl saıyn atalyp ótetin kásibı mereke — Notarıýs kúni bolyp bekitildi. 1997 jyldyń dál osy kúni «Notarıat týraly» Zańǵa qol qoıyldy.
Qazaqstan Respýblıkasyndaǵy notarıat — bilikti zań kómegin kórsetý, notarıattyq is-áreketter jasaý arqyly jeke jáne zańdy tulǵalardyń quqyqtary men zańdy múddelerin qorǵaýdy qamtamasyz etetin zańdy mekeme. Ol qurylǵan kezden bastap qazirgi ýaqytqa deıin memleketimizdiń mańyzdy ınstıtýttarynyń biri bolyp qala beredi. Kún ótken saıyn notarıattyq mekeme jańǵyrtylýda, notarıattyq keńseniń tabysty damýynyń kepili notarıattyq qoǵamdastyq músheleriniń joǵary kásibıligi men jaýapkershiligi bolyp sanalady.
ESTE QALAR OQIǴALAR
1997 jyly «Qazatomónerkásip» Ulttyq atom kompanııasy quryldy, ol Qazaqstan Respýblıkasynyń ýrandy, sırek metaldardy, atom elektr stantsııalaryna arnalǵan ıadrolyq otyndy ımporttaý jáne eksporttaý jónindegi ulttyq operatory bolyp tabylady. Kompanııanyń jalǵyz aktsıoneri «Samuryq-Qazyna» AQ bolyp tabylady. 2009 jyldan beri Qazaqstan tabıǵı ýran óndirýden álemde kóshbasshy bolyp keledi. Qazaqstandyq ýran kontsentraty beıbit atom energııasy qajettiliginiń 40%-dan astamyn qamtamasyz etedi jáne atom elektr stantsııalary jumys isteıtin álemniń barlyq elderine jetkiziledi.
2005 jyly Almatyda Ortalyq Azııadaǵy adam quqyqtary jónindegi musylmandar komıtetiniń bas keńsesi ashyldy, onyń maqsaty — ulttyq, dinı jáne saıası kózqarastaryna qaramastan azamattardyń quqyqtaryn qorǵaý.
2006 jyly Qazaqstan men Chernogorııa arasynda dıplomatııalyq qarym-qatynas ornatyldy.
Chernogorııa — Balqan túbeginiń batys bóliginde ornalasqan shaǵyn memleket. Ol Adrıatıka teńizimen jýylady jáne batysynda Horvatııamen, soltústik-batysynda Bosnııa jáne Gertsegovınamen, soltústiginde Serbııamen, shyǵysynda Albanııamen shektesedi. Aýdany — 13 812 km². Astanasy — Podgorıtsa. Valıýta — eýro. Tili — Chernogorııa, halyqtyń 60% serb tilin paıdalanady. Chernogorııa prezıdenti — tikeleı saılaý arqyly bes jyl merzimge saılanatyn memleket basshysy.
2009 jyly Qaraǵandy mańynda, Nura ózeniniń orta aǵysy aımaǵynda Qaraǵandy memlekettik ýnıversıtetiniń arheologtarynyń ekspedıtsııasy boldy. Evneıa Býketova saq dáýirindegi zattardy ashqan. Samarqand pen Tegijol aýyldarynyń aralyǵyndaǵy Temirqash jolynda júrgizilgen qazba jumystary nátıjesinde temir qystyrǵysh, belbeýlerge arnalǵan taratqysh saqına, jebeniń ushy jáne jaýyngerdiń toǵasy tabyldy. Arheologtardyń aıtýynsha, bul nysandardyń jasy eki myń jyldan asqan.
2009 jyly Qazaqstan quramasy 50-shi halyqaralyq matematıkalyq olımpıadaǵa qatysý úshin Bremen qalasyna (Germanııa) keldi.
Matematıkalyq olımpıadanyń halyqaralyq uıymdastyrý komıtetiniń qorytyndy otyrysynda 95 memleket ókilderiniń biraýyzdan qabyldaǵan sheshimimen Qazaqstan 2010 jyly 51-shi halyqaralyq matematıkalyq olımpıadany uıymdastyrýshy el bolyp tańdaldy.
2011 jyly Qazaqstanda aqyn, jýrnalıst, dramatýrg jáne kompozıtor Qasym Amanjolovtyń týǵanyna 100 jyl tolýyna arnalǵan «Este qalarlyq, mereıtoılyq datalar» serııasynyń poshtalyq markasy aınalymǵa engizildi.
Marka ofsettik ádispen tórt tústi, taraq perforatsııasymen basylǵan. Marka ólshemi — 33×27,5 mm, taralymy — 30 myń dana. Sýretshi — Nıkolaı Sokolov.
2014 jyly Qazaqstan Jastar saıasaty jónindegi birinshi jahandyq forýmǵa qatysý úshin Bakýge (Ázerbaıjan) shaqyryldy.
Bul forýmnyń negizgi maqsaty — jastar saıasatyn daıyndaýǵa qatysty halyqaralyq deńgeıde ortaq túsinistik pen nusqaýlardy qalyptastyrý maqsatynda jastar saıasaty salasyndaǵy jahandyq jaǵdaıǵa sholý jasaý, jastarmen jumys jasaý baǵdarlamalarynyń shynaıylyǵyn baǵalaý boldy.
2014 jyly alty jasar almatylyq qyz Avstrııada ótken talanttar shoýynda halyq bılerin oryndap, Qazaqstannyń dańqyn asqaqtatty. Sofı Manasıan altyn músinshe men arnaıy «Altyn úmit» syılyǵyn aldy. Kishkentaı almatylyq «Dańq mınýtynyń» avstrııalyq balamasymen qazylar alqasy men jurtshylyqtyń júregin jaýlap aldy. Festıval uıymdastyrýshylary oǵan ashylý saltanatynda óner kórsetýdi senip tapsyrdy.
2016 jyly qazaq baletiniń ósip kele jatqan juldyzy, «Astana Opera» teatrynyń jetekshi solısi Baqtııar Adamjan Ystambulda (Túrkııa) ótken V halyqaralyq balet óneri baıqaýynyń Gran-prıin jeńip aldy. Baıqaýǵa qatysý úshin Qazaqstan, Reseı, Avstralııa, Brazılııa, Bolgarııa, Japonııa, Kanada, Ońtústik Afrıka, Ońtústik Koreıa jáne basqa da kóptegen elderdiń balet ártisteri jınaldy.
2019 jyly Shyǵys Qazaqstan oblysynda biregeı gıbrıdti operatsııa bólmesi ashyldy.
Semeı qalalyq jedel járdem aýrýhanasy bazasyndaǵy hırýrgııalyq aralasýlarǵa arnalǵan joǵary tehnologııalyq keshen respýblıkadaǵy osyndaı biregeı keshen boldy.
2023 jyly Belarýstiń Vıtebsk qalasynda ótken «Slavıan bazary» baıqaýynyń Gran-prıin qazaqstandyq 12 jastaǵy ánshi Sherhan Arystan jeńip aldy. Jas ánshi qazylar alqasynyń eń joǵary baǵasyn aldy — birinshi jáne ekinshi kúnderi árqaısysy 70 upaı. Sherhan Arystan qazylar alqasyn kúshti vokalymen tánti etti.
