14 shilde. QazAqparat kúntizbesi
ESTE QALAR OQIǴALAR
1997 jyly Qazaqstan Respýblıkasy Prezıdentiniń Jarlyǵymen «Qazatomónerkásip» ulttyq atom kompanııasy quryldy.
2005 jyly Almatyda Ortalyq Azııadaǵy adam quqyǵyn qorǵaıtyn Musylman komıtetiniń bas keńsesi ashyldy. Komıtet músheleri bolyp zańgerler, teologter jáne dinı qaýym ókilderi tirkeldi. Uıymnyń maqsaty – azamattardyń ultyna, dinine jáne saıası tıistiligine qaramastan, quqyǵyn qorǵaý.
2006 jyly Qazaqstan men Chernogorııa arasynda dıplomatııalyq qarym-qatynas ornatyldy. Chernogorııa – Balqan túbeginiń batysynda ornalasqan shaǵyn memleket. Batysynda Horvatııa, soltústik-batysynda Bosnııa jáne Gertsegovınamen, soltústiginde Serbııa, shyǵysynda Albanııamen shektesedi. Aýmaǵy – 13 812 km². Astanasy – Podgorıtsa qalasy. Valıýtasy – eýro. Tili – chernogor, turǵyndarynyń 60%-y serb tilinde sóıleıdi. Chernogorııa prezıdenti memleket basshysy bolyp sanalady. Ol tikeleı saılaý arqyly 5 jyl merzimge saılanady.
2009 jyly E. Bóketov atyndaǵy Qaraǵandy memlekettik ýnıversıtetiniń arheologter ekspedıtsııasy Nura ózeniniń ortańǵy aǵysynyń tusynan saq dáýiriniń jádigerlerin tapty. Samarqand jáne Tegisjol aýyldarynyń arasyndaǵy Temirqash shatqalynda júrgizilgen qazba jumystarynyń nátıjesinde temir qoramsaq, jebeniń ushy, jas sarbaz belbeýiniń aıylbasy sııaqty zattar tabylǵan. Arheologter bul jádigerlerge 2 myń jyldan astam ýaqyt bolǵan dep paıymdady.
2009 jyly Qazaqstan qurama komandasy 50-shi halyqaralyq matematıka olımpıadasyna qatysý úshin Bremen qalasyna (Germanııa) bardy. Halyqaralyq matematıka olımpıadasynyń uıymdastyrý komıtetiniń qorytyndy otyrysynda 95 eldiń ókilderi 2010 jyly 51-shi Halyqaralyq matematıka olımpıadasyn uıymdastyrýshy el retinde Qazaqstandy tańdady.
2009 jyly Almatyda qashyqtyǵy 1 500 shaqyrym Almaty-Býrabaı baǵyty boıynsha avtojarys-ekspedıtsııa ótti.
2011 jyly Qazaqstan aýmaǵynda aqyn, jýrnalıst, dramatýrg jáne kompozıtor Qasym Amanjolovtyń týǵanyna 100 jyl tolýyna oraı poshta markasy qoldanysqa engizildi.
2011 jyly Petropavl qalasynyń ortalyǵynda Qazaqstan Konstıtýtsııasy men P. Vasılev kósheleriniń qıylysynda bıiktigi 28,5 metrlik Táýelsizdik stelasynyń qurylysy bastaldy. Onyń eń joǵarǵy tusyna Samuryq qusy ornatylǵan.
2012 jyly Amerıkanyń Nadine Krakov Collection dúkeni eVaý elektrondy aýktsıonynda XVII ǵasyrda Qazaqstanda tigilgen álemdegi eń qymbat taqııany satylymǵa shyǵardy. Asyl tastarmen áshekeılengen kóne bas kıimniń bastapqy baǵasy 15,5 myń dollar retinde belgilendi.
2014 jyly Qazaqstan jastar saıasaty boıynsha birinshi jahandyq forýmǵa qatysý úshin Bakýge (Ázerbaıjan) shaqyrtyldy.
2014 jyly alty jasar almatylyq búldirshin Sofı Manasıan Avstrııadaǵy talanttylar shoýynda Qazaqstannyń atyn shyǵardy. Sofı bul baıqaýda altyn statýetka men «Altyn úmit» arnaıy júldesin jeńip aldy. Festıval uıymdastyrýshylary Sofıge festıvaldiń ashylý saltanatynda óner kórsetýdi senip tapsyrdy.
2016 jyly Qazaqstandyq balet juldyzy, Astana Opera teatrynyń jetekshi solısi Baqtııar Adamjan Ystanbulda (Túrkııa) V halyqaralyq balet ártisteri baıqaýynda gran-Prı ıegeri atandy.
2019 jyly Semeı qalasyndaǵy jedel medıtsınalyq járdem aýrýhanasynda gıbrıdti hırýrgııalyq operatsııalar úshin jańadan joǵary tehnologııalyq zal ashyldy. Bul – respýblıkadaǵy jalǵyz keshen. Gıbrıdti operatsııalyq zaldyń ereksheligi sonda, munda máselen, jol apatyna túsken naýqasqa birden birneshe operatsııa túrin jasaýǵa bolady. Naýqastyń júregine jáne basyndaǵy mıyna ashyq tásildermen ota jasaýǵa múmkindik tolyq bar.
2019 jyly Atyraý mańyndaǵy Aqtóbe-Laetı qalashyǵyndaǵy qazba jumystary kezinde arheologter orta ǵasyrlardaǵy jumbaq tas ıadrosyn tapty. «Ejelgi – XIV-XVI ǵasyrlardaǵy Aqtóbe-Laetı qalasyndaǵy qazba jumystaryn qaıta bastaǵan kezde bizge sáttilik serik boldy. Birinshiden, ondaǵan peshi bar tutas ónerkásipti qazyp aldyq. Olarǵa metall quıyp, sapaly keramıkalyq ydys-aıaq, tipti shyny jasaǵan. Biraq, eń qundy jáne ázirge túsiniksiz tabysymyz – tesikteri bar tas ıadrosy, ishinde metall dop bar. Mundaı ıadrony ne úshin daıyndaǵany ázirge túsiniksiz», - dedi arheolog Marat Hasenov.
