130 joba: Almaty áýejaıynda aldaǵy jyldary ne salynady
ALMATY. KAZINFORM — Almaty halyqaralyq áýejaıyn basqarýshy TAV Airports kompanııasy áýe aılaǵyn 2050 jylǵa deıin damytýdyń bas josparyn tanystyrdy.
Almaty halyqaralyq áýejaıynyń prezıdenti Goker Koseniń aıtýynsha, áýe aılaǵyna 2050 jylǵa deıin 5 kezeń boıynsha ınvestıtsııa salynady. 2025-2028 jyldar aralyǵyndaǵy birinshi kezeńde áýejaı ınfraqurylymyna 362 mln AQSh dollary jumsalmaq. Onyń aıasynda 130 joba iske asyrylady.
— Іri jobalardyń biri — ishki termınaldy tolyq jańǵyrtý jáne uzyndyǵy 4400 metr bolatyn jańa rýldeý jolyn salý. Negizgi ushý-qoný jolaǵy tolyq buzylyp, beton negizinde jańasy salynady. Sonymen qatar júk perrony men iri tehnıkalyq angar salynady. Odan bólek ushaqtardy muzdanýǵa qarsy óńdeıtin alań bolady, — dedi Goker Kose.
Sondaı-aq birinshi kezeń aıasynda VIP-perron men áýe kemeleriniń turaqtaryn jańartý, aerodrom keshenin salý jáne otyn ınfraqurylymyn jańartý jáne áýejaı mańynan jańa qonaqúı men kópdeńgeıli avtoturaq salý josparlanǵan.
— 2025 jyly biz 12,5 mıllıon jolaýshyǵa qyzmet kórsetemiz, olardyń jartysy — halyqaralyq baǵyttaǵy jolaýshylar. Qazirgi tańda biz táýligine 150 reıs oryndaımyz jáne bul kórsetkish turaqty ósip keledi. 2050 jylǵa deıin 40 mıllıon jolaýshyǵa qyzmet kórsete alatyn zamanaýı, ekologııalyq taza jáne tehnologııalyq ınfraqurylym qalyptastyramyz, — dedi áýejaı basshysy.
Resmı bólimnen keıin BAQ ókilderimen tildesken Goker Kose 2050 jylǵa deıin jalpy qansha ınvestıtsııa salynatynyn aıtqan joq. Onyń paıymdaýynsha, bul uzaq merzimdi jospar bolǵandyqtan, naqty aıtý múmkin emes. Biraq ol áýejaıdyń damýyna 25 jylda 1,5 mlrd dollar qarjy quıylýy múmkin dep boljady.
Eske salaıyq, 2021 jyly Almatynyń halyqaralyq áýejaıy Túrkııanyń TAV kompanııasynyń menshigine ótti.
Byltyr 1 maýsym kúni Almaty áýejaıynyń jańa termınaly alǵashqy reısterdi qabyldady.
Keıin Almaty áýejaıynyń prezıdenti jańa termınalǵa aıtylǵan synǵa jaýap berdi.