13 túrli azyq-túlikti tikeleı efırde satýǵa tyıym salynady - sheteldegi qazaq baspasózi
ASTANA. KAZINFORM - Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstannyń lımon eksportynyń negizgi alýshylary Qazaqstan men Reseı – ÓzA
Ózbekstan 2025 jyldyń qańtar–qarasha aılarynda 11 shet memleketke jalpy quny 5,4 mln AQSh dollaryn quraıtyn 3,8 myń tonna lımon eksporttady. Bul kórsetkish ótken jyldyń sáıkes kezeńimen salystyrǵanda 764 tonnaǵa nemese 25 paıyzǵa artqan.
Bul týraly osy aptada «ÓzA» aqparat agenttigi habarlady.
Ulttyq statıstıka komıtetiniń málimetinshe, atalǵan kezeńde Ózbekstan Qazaqstanǵa eń kóp jetkizgen lımon jetkizgen (1 827 tonna) el bolyp otyr. Ekinshi iri satyp alýshy retinde Reseı tirkelgen – 1 740 tonna. Osylaısha, eksporttyń negizgi bóligi dál osy eki naryqtyń úlesine tıesili boldy.
Sonymen qatar, Qyrǵyzstanǵa 236,5 tonna lımon eksporttalǵan. Belarýske – 4,7 tonna, Birikken Arab Ámirlikterine – 3,8 tonna, al basqa elderge 3,9 tonna lımon jetkizildi.
Ózbekstandyq BAQ-tyń dereginshe, Ózbekstan lımon eksportynyń geografııasyn kezeń-kezeńimen keńeıtip kele jatqanymen, negizgi satyp alýshylar retinde Qazaqstan men Reseı kóshbasshylyq ornyn saqtap otyr.
Sondaı-aq osy aptada «ÓzA»-da «Qazaqstan men Ózbekstan Syrdarııa ózeninde avtomattandyrylǵan gıdrobeket ornatý jobasyn bastamaq» degen taqyrypta aqparat jarııalandy.
Ózbekstandyq basylymnyń QR Sý resýrstary jáne ırrıgatsııa mınıstrligi baspasóz qyzmetine silteme jasap habarlaýynsha, joba aıasynda Qazaqstan men Ózbekstan aýmaǵynda bes-besten nysan salynady.
Germanııanyń Halyqaralyq yntymaqtastyq qoǵamynyń (GIZ) qoldaýymen ázirlengen bul joba transshekaralyq sýdy bólýdiń ashyqtyǵy men dáldigin qamtamasyz etýge baǵyttalǵan. Qazirgi ýaqytta GIZ osy joba boıynsha tehnıkalyq tapsyrmany ázirleýdi aıaqtaǵan.
Sý resýrstary jáne ırrıgatsııa mınıstri Nurjan Nurjigitovtiń aıtýynsha, byltyr eki memleket basshylarynyń qatysýymen transshekaralyq sý nysandaryn birlesip basqarý jáne utymdy paıdalaný týraly úkimetaralyq kelisimge qol qoıylǵan. Bul qujat kópjyldyq jumystyń nátıjesi boldy, sonyń arqasynda transshekaralyq sýdy basqarýdyń kelisilgen tásilderin ázirleý múmkin boldy. Sondyqtan atalǵan kelisimniń qabyldanýy tarıhı mańyzǵa ıe oqıǵa. Kelisim Ortalyq Azııadaǵy sý dıplomatııasyn damytýǵa eleýli úles qosady jáne bolashaqtaǵy ózara tıimdi yntymaqtastyqtyń negizgi baǵyttaryn naqty aıqyndaıdy.
Kóktoǵaıdyń Turǵyn aýylynda aýa temperatýrasy –50°C-qa jaqyndady – CNR
18 qańtarda Qytaıdyń Shyńjań ólkesindegi Altaı aımaǵy, Kóktoǵaı aýdanyna qarasty Turǵyn aýylynda aýa temperatýrasy –47,4°C-qa deıin tómendedi. Bul kórsetkish – óńirde osy qys maýsymynda tirkelgen eń tómengi temperatýra, dep habarlaıdy Qytaıdyń Ortalyq halyq radıosy.
Altaı aımaqtyq meteorologııalyq stantsııanyń málimetinshe, eń tómengi temperatýra 18 qańtar kúni tańerteń tirkelgen. Alaıda –47,4°C aýyl úshin tarıhı rekord emes. Eń tómengi kórsetkish 2024 jylǵy 18 aqpanda –52,3°C bolǵan. Bul -52,3℃ Shyńjańda tirkelgen eń tómengi temperatýra rekordyn jańartqan.
Aıta keteıik, atalǵan jaǵdaıǵa baılanysty jergilikti bılik tótenshe sharalar qabyldap, jylýmen qamtý, jol qaýipsizdigi jáne aýyl sharýashylyǵyn qorǵaý jumystaryn kúsheıtken.
13 túrli azyq-túlikti tikeleı efırde satýǵa tyıym salynady – Harajorga
Qytaıda tikeleı efır arqyly satýǵa (live-commerce) 13 túrli azyq-túlikke tyıym salyndy. Bul týraly 16 qańtarda «Tikeleı efırde saýdamen aınalysatyn sýbektilerdiń azyq-túlik qaýipsizdigine jaýapkershiligin baqylaý týraly ereje» jarııalandy. Qujat 20 naýryzdan bastap kúshine enedi, dep habarlaıdy Harajorga basylymy.
Baqylaý organdarynyń málimetinshe, tekseris barysynda tutynýshylar tarapynan eń kóp shaǵym túsken negizgi máseleler – jaramsyz jáne merzimi ótken ónimderdiń satylýy, jalǵan jarnama men asyra maqtaý, sondaı-aq ónim týraly jalǵan nemese shatastyratyn aqparattyń berilýi.
Qytaılyq BAQ-tyń habarlaýynsha, 13 túrli azyq-túlikti tikeleı efır arqyly satýǵa tyıym salynady. Jańa erejege sáıkes, tikeleı efırde ýly jáne zııandy zattar qosylǵan, mıkrobtar men aýyr metaldar mólsheri normadan asqan, merzimi ótken nemese buzylǵan azyq-túlikterdiń saýdasyn jasaýǵa bolmaıdy. Sonymen qatar aýrý nemese karantın talaptaryna saı kelmeıtin mal men qus etin, sondaı-aq tańbalanbaǵan jáne zańmen tyıym salynǵan ónimderdi satýǵa qatań tyıym salynady.
- Bılik bul sharalar halyqtyń azyq-túlik qaýipsizdigin qamtamasyz etýge jáne tutynýshylardyń quqyqtaryn qorǵaýǵa baǵyttalǵanyn atap ótti, dep túıindeıdi Harajorga.
Qazaqstannyń materıaldyq emes mádenı murasy Beıjińde tanystyryldy – «Halyq gazeti»
2026 jylǵy 10 qańtar kúni «Qazaq-Oner Ulttyq qaýymdastyǵy» Qazaqstannyń Qytaıdaǵy Elshiliginiń jáne Qazaqstannyń Beıjińdegi mádenıet ortalyǵynyń qoldaýymen materıaldyq emes mádenı murany saqtaý, nasıhattaý jáne mádenıetaralyq kommýnıkatsııany damytý máselelerine arnalǵan halyqaralyq semınar uıymdastyrdy. Bul týraly Qazaqstan Respýblıkasynyń Qytaı Halyq Respýblıkasyndaǵy Elshiligi jazdy, dep habarlaıdy «Halyq gazeti».
Atalǵan BAQ-tyń dereginshe, Qazaq tarapynan semınarǵa «Qazaq-Oner Ulttyq qaýymdastyǵynyń» prezıdenti, Qazaqstandaǵy «IOV World» ókili Aıgúl Janserikova, QR Halyq ártisi Aıgúl Qusanova, óner jáne mádenıet qaıratkerleri, dástúrli mýzyka jáne sándik-qoldanbaly óner salasyndaǵy mamandar qatysqan.
Sonymen qatar, semınar barysynda qazaq halqynyń mýzykalyq murasyna, oryndaýshylyq ónerdiń dástúrli túrlerine, sondaı-aq mádenı dástúrlerdi saqtaý men tapsyrýdyń zamanaýı tásilderine arnalǵan baıandamalar men prezentatsııalar usynyldy.
Sondaı-aq osy aptada «Halyq gazeti» basylymynda «Qytaı álemdegi eń iri elektr kólikterin zarıadtaý jelisin qurdy» degen aqparat jaryq kórdi.
Qytaılyq BAQ-tyń málimetinshe, 2026 jyly 21 qańtar kúni Ulttyq energetıka basqarmasy Qytaı eli álemdegi eń iri elektr kólikterin zarıadtaý jelisin qurǵanyn, onyń 40 mıllıonnan astam jańa energııa kólikteriniń zarıadtalýyn qanaǵattandyra alatynyn jarııalaǵan.
Keltirilgen derekterge súıensek, 2025 jyldyń sońyna deıin búkil el boıynsha zarıadtaý ınfraqurylymynyń jalpy sany 20,092 mıllıondy quraǵan. Bir qoǵamdyq zarıadtaý tireginiń ortasha qýaty 46,5 kılovattqa jetip, sáıkes mezgilmen salystyrǵanda 33%-ǵa artqan.
Aıta keteıik, búkil el boıynsha tasjol qyzmet kórsetý aımaqtarynda barlyǵy 71 500 zarıadtaý stantsııasy salynyp, qamtý deńgeıi 98%-dan asty. Al zarıadtaý qondyrǵylary 19 ólkelik ákimshilik aımaqtaǵy aýyl-qalashyqtardy tolyǵymen qamtyǵan.
Irannyń Eýrazııamen saýdasy ósip, Qytaıdyń eksporty rekordtyq kórsetkishke jetti - ParsToday
Irannyń Eýrazııa ekonomıkalyq odaǵymen saýdasy osy jyldyń alǵashqy segiz aıynda 16 paıyzǵa ósti, al erkin saýda týraly kelisimniń júzege asyrylýymen eki taraptyń saýdasynyń basym bóligi nóldik tarıftermen jasaldy, dep jazdy ParsToday aqparat agenttigi.
Irandyq BAQ-tyń dereginshe, Irannyń Saýdany damytý uıymynyń basshysy Muhammad Álı Dehgan Dehnavı Eýrazııa ekonomıkalyq odaǵymen jáne Halyqaralyq Eýrazııa kórmesimen saýda úılestirý otyrysynda Irannyń Eýrazııa ekonomıkalyq odaǵyna múshe eldermen saýda kólemi osy jyldyń (1404) alǵashqy segiz aıynda 16 paıyzǵa óskenin málimdedi.
Dehgan Dehnavıdyń aıtýynsha, 15 mamyrda kúshine enýge daıyn bolǵan erkin saýda týraly kelisim Iran men Eýrazııa arasyndaǵy saýdanyń 87 paıyzyn nóldik tarıfterge jatqyzdy. Osy odaqpen saýdadaǵy bos qýattarǵa toqtala otyryp, ol tek Reseımen saýdada 12 mıllıard dollar paıdalanylmaǵan qýat bar ekenin atap ótti.
Sonymen bul jazbada Qytaıdyń eksporty týraly da toqtalǵan. Keltirilgen derekterge súıensek, Qytaıdyń eksporty 2025 jyly buryn-sońdy bolmaǵan deńgeıge jetken.
Irandyq BAQ-tyń dereginshe, Qytaıdyń kedendik derekteri Tramp úkimeti engizgen tarıfterge qaramastan, eldiń 2025 jyly syrtqy saýdada jańa rekordtyq deńgeıge jetkenin kórsetti. Qytaıdyń eksporty jeltoqsanda ótken jylmen salystyrǵanda 6,6 paıyzǵa, al ımport 5,7 paıyzǵa ósken. Qytaıdyń Amerıka Qurama Shtattaryna eksporty 2025 jyly 20 paıyzǵa tómendedi, biraq Afrıkaǵa eksport 25,8 paıyzǵa, ASEAN elderine eksport 13,4 paıyzǵa ósti. Eýropalyq Odaqqa eksport ta 8,4 paıyzǵa ósken.
TRT-men birlesip túsirilgen fılm «Oskar» tizimine endi - TRT
TRT-men birlesip túsirilgen «Palestine 36» («Palestına 36») fılmi 98-shi Akademııa syılyǵynda «Eń úzdik halyqaralyq tolyqmetrajdy fılm» nomınatsııasynyń qysqa tizimine endi. Bul – palestınalyq kıno jáne aımaqtyq kınoóndiris úshin mańyzdy jetistik, dep habarlady Túrkııa Radıo Televızııa portaly.
- TRT bas dırektory Zahıd Sobadjy «X» jelisinde bul jańalyqty habarlap, «Kınonyń kúshi arqyly Palestına tarıhyn ashyp kórsetetin oqıǵany álemge jetkizip otyrǵanymyzdy maqtan tutamyz», - dep jazǵan.
«TRT»-nyń dereginshe, palestınalyq rejısser Annemarı Jasır túsirgen «Palestına 36» fılmi 1936 jyly brıtandyq basqarýǵa qarsy bolǵan arab kóterilisin qaıta beıneleıdi. Kartına jerinen aıyrylýdyń alǵashqy belgileri aıasynda palestınalyq jumysshylar men kóterilisshilerdiń ómirin baıandaıdy.
- Brıtan-lıvandyq prodıýser Saýssan Asfarı túsirgen bul tarıhı drama keń kólemdi zertteýler men muraǵat materıaldaryna negizdelgen. Fılm búgin Izraıl okkýpatsııasynda turǵan aýmaqtarda bir kezderi bolǵan palestınalyq ýnıversıtetterdi, mekemelerdi jáne qaýymdastyqtarǵa nazar aýdarady, - dep jazdy túrkııalyq BAQ.