13 bank pen ulttyq poshta operatory tólem kartasyn qashyqtan beredi

NUR-SULTAN. QazAqparat - QR Aqparat jáne qoǵamdyq damý mınıstri Dáýren Abaev tólem kartasy joq halyqtyń bankte kezekte turǵany jóninde pikir bildirdi, dep habarlaıdy QazAqparat.

«Iá, karta ashtyrýǵa kezek boldy. Elimizde qaýyrt jaǵdaı qalyptasqandyqtan, odan qashyp qutylý múmkin emes te edi. Sondyqtan, azamattardan túsinistikpen qaraýdy ótindik», - dep atap ótti mınıstr «Habar» arnasyndaǵy «Ashyq dıalog» baǵdarlamasynda.

Onyń aıtýynsha, bul máselede bıznes te, memleket te jumysyn barynsha ońtaılandyrdy. Tótenshe jaǵdaı men qatań karantın kezinde bul tipti múmkin emes edi.

«Biraq, qazirgi ýaqytta 13 bank pen ulttyq poshta operatory qashyqtan karta berý qyzmetin usynyp otyr. Kóptegen bankter kartany úıge jetkizý, kartasyz jáne komıssııasyz qolma-qol aqsha shyǵarý qyzmetterin iske qosty. Biraz ýaqyt ótken soń, munyń bárin eńserip, halyqtyń kartasyz júrgeni umytylady», - dedi Dáýren Abaev.