1200 shaqyrymdyq uly báıge: Shabandozdar Túrkistan oblysyna jetti

TÚRKІSTAN. QazAqparat - «Uly dala joryǵy» respýblıkalyq báıge-marafonyna qatysýshylar 8 kúnde 800 shaqyrym júrip ótip, Túrkistan óńirine jetti, dep habarlaıdy QazAqparat tilshisi.

Búgin marafonshylar Betpaqdala shólinde toǵyzynshy kezeńdi eńserýde. Keshke qaraı shabandozdar Túrkistan oblysy Sozaq aýdanynyń Taıqońyr eldi mekenine at basyn tiredi. Odan ary qaraı Aqsúmbe, Baqyrly, Abaı aýyldaryna saparlaıdy. Máre – Túrkistan qalasy.

Aıta ketý kerek, márege nebári 400 shaqyrym jol qaldy. Alaıda marafonnyń aýyr synaǵyna tótep bere almaı, jarys jolynan shyǵyp jatqandar bar.

Segizinshi kúnniń qorytyndysy boıynsha, Aqtóbe oblysynyń komandasy úzdik dep tanyldy.

Jalpy, qazirgi tańda 19 komandanyń 8-i jarysty jalǵastyryp jatyr. Al 11 komanda túrli sebeptermen jarys jolynan shyǵyp qaldy.

Qazaq rýhanııatynyń qasterli qarashańyraǵy Túrkistan qalasyna birinshi bolyp jetken komanda «Uly dala sarbazy» ataǵyna ıe bolyp, 30 mln teńge kólemindegi aqshalaı júldemen marapattalady. Ekinshi jáne úshinshi oryn ıegerleri sáıkesinshe 20 mln teńge jáne 15 mln teńge júldeni qanjyǵaǵa baılaıdy.

Aıta ketsek, marafondy QR Mádenıet jáne sport mınıstrligi, «AMANAT» partııasy, «The Great Steppe Tour» qoǵamdyq qory men Ulttyq sport túrleri qaýymdastyǵy uıymdastyrdy.

Báıge-marafon 18 qyrkúıek kúni elordadan bastaý aldy. Jarys jolyna 100-den astam shabandoz shyqqan bolatyn. Talap – Túrkistanǵa deıin 1200 shaqyrymdy eńserý. Marafon árqaısysy 100 shaqyrymdy quraıtyn 12 kezeńge bólingen.