1200-ge jýyq qazaqstandyq álemniń úzdik JOO-da oqyp jatyr
Olardyń ishinde prezıdenttik stıpendııanyń 50 ıegeri Shyrmaýyq lıgasyna kiretin álemdegi eń bedeldi ýnıversıtetterde oqıdy. Olar: Garvard, Kolýmbııa, Iel, Prınston, Braýn, Dartmýt, Kornell ýnıversıtetteri jáne Pensılvanııa ýnıversıteti.
«Shyrmaýyq lıgasynda oqýdyń artyqshylyǵy - kóptegen Nobel syılyǵynyń laýreattary men basqa da bedeldi marapattardyń ıegerlerinen tálim alyp, úırenýge múmkindigimiz bar. Men ýnıversıtette jasandy ıntellektti, Zattar ınternetin (ІoT) oqımyn, sondaı-aq uzaq merzimdi perspektıvaǵa strategııany qalaı qurý kerek ekenin túsiný úshin bıznes mektepten sabaq aldym. Qazaqstandyq telekom-naryq úlken transformatsııa aldynda tur jáne áleýetti ınvestorlar úshin tartymdy. Oqýdy aıaqtaǵannan keıin osy baǵytta qyzmet jasap, Qazaqstandaǵy ІT jáne kommýnıkatsııalardy damytýǵa óz úlesimdi qosqym keledi», - dedi «Bolashaq» stıpendııasynyń ıegeri Áıgerim Qydyrǵalıeva.
Áıgerim «Bolashaq» baǵdarlamasy boıynsha Kolýmbııa ýnıversıtetiniń magıstratýrasynda oqıdy. Munda ol elektronıka men telekommýnıkatsııalyq júıelerdi úırenedi.
Stıpendııanyń 29 jyldyq tarıhynda «Bolashaq» halyqaralyq baǵdarlamasynyń túlekter sany 11 700-den asty. Olar álemniń 200-den astam jetekshi ýnıversıtetinde bilim aldy.
