12 mamyr. QazAqparat kúntizbesi
ATAÝLY KÚNDER
Halyqaralyq medbıkeler kúni
Qyrym soǵysy kezinde (1853-1856) sanıtarlar jasaqtaryn uıymdastyryp, olarǵa basshylyq etken aǵylshyn medbıkesi - Florens Naıtıngeıldiń týǵan kúni qurmetine oraı atap ótiledi. Ár eki jyl saıyn Halyqaralyq Qyzyl Krest jáne Qyzyl Jarty Aı qozǵalysy eń úzdik 50 medbıkege Florens Naıtıngeıl atyndaǵy medaldardy tapsyrady.
ESTE QALAR OQIǴALAR
1995 jyly Koreıa Respýblıkasynda Qazaqstan Respýblıkasynyń elshiligi ashyldy.
2003 jyly Shymkenttegi áskerı áýejaıda «Amýr» jańa radıolokatsııalyq qurylǵysynyń tanystyrylymy ótti. Onyń iske qosylýymen «Kazaeronavıgatsııa» RMM OQO áýesin baqylaý múmkindigine ıe boldy. Oǵan deıin oblystyń áýe keńistigin Tashkent áýejaıy baqylap otyratyn. Qurylǵy 230 km radıýsta 12000 metr bıiktikke deıingi keńistikti baqylaýǵa múmkindik beredi.
2005 jyly Belarýs Respýblıkasynyń astanasy Mınsk qalasynda Ekinshi dúnıejúzilik soǵysqa qatysqan qazaqstandyq jaýyngerlerge eskertkish ashyldy. Osy is-shara M.Áýezov atyndaǵy orta mekteptiń aýlasynda ótti. Soǵys jyldary Keńes Odaǵynyń Batyry atanǵan 500 qazaqstandyqtyń 70-i Belarýsti fashıstik basqynshylardan azat etý barysynda ataq alǵan, sondaı-aq osy elde 14 000 qazaqstandyq jaýynger qaza tapqan.
2007 jyly Túrikmenbashy qalasynda ótken úshjaqty sammıtte Qazaqstan, Reseı jáne Túrikmenstan Prezıdentteri - Nursultan Nazarbaev, Vladımır Pýtın jáne Gýrbangýly Berdymuhamedov Kaspıı gaz qubyryn salý týraly birlesken deklaratsııany qabyldady. Gaz qubyry Kaspıı jaǵalaýyn boılaı, Qazaqstan men Reseı arqyly Túrikmenstan aýmaǵy arqyly ótetin bolyp mejelendi.
2010 jyly Úndistan Respýblıkasynyń Syrtqy ister mınıstri Somanahallı Mallaıah Krıshnanyń Qazaqstan Respýblıkasyna sapary aıasynda kelissózder júrgizilip, saıası, ekonomıkalyq jáne gýmanıtarlyq salalardaǵy Qazaqstan-Úndistan yntymaqtastyǵynyń máseleleri talqylandy. Kelissózder nátıjesinde Qazaqstan Respýblıkasy Úkimeti men Úndistan Úkimeti arasyndaǵy mádenıet, óner, medıa jáne sport salasyndaǵy yntymaqtastyq týraly kelisimge qol qoıyldy.
2014 jyly Qazaqstanda fýtboldan Ulttyq stýdenttik lıgasy quryldy. Joba aıasynda yntymaqtastyq týraly tıisti memorandýmǵa Qazaqstan Bilim mınıstrligi men QR Fýtbol federatsııasy qol qoıdy. Jasalǵan memorandýmǵa sáıkes taraptar birlesip Qazaqstandaǵy bilim berý uıymdarynyń arasynda óńirlik jáne respýblıkalyq týrnırler ótkizedi. Sondaı-aq qujat QR-da stýdentter men oqýshylardy sporttyń osy túrine tartý arqyly buqaralyq fýtboldy damytýdy kózdeıdi.
2017 jyly Mańǵystaý oblysynda alǵash ret Aıraqty-Shomanaı ańǵarynda geoglıfter galereıasy paıda boldy. Olardy mańǵystaýlyq arheolog Andreı Astafev qurastyrdy. Olardyń ólshemderi ártúrli, eń úlkeni 350 metrge 270 metr keledi. Erekshe nazar aýdaratyn geoglıfter etnoaýylǵa, Adaı ata tarıhı-mádenı ortalyǵyna, Otpantaýǵa keletin týrıster sanyn arttyrýǵa septigin tıgizedi.
2017 jyly Óskemende Lıtva Respýblıkasynyń konsýldyǵy ashyldy. Ol eki el arasyndaǵy ekonomıkalyq, mádenı jáne saıası baılanysty nyǵaıtýǵa jaǵdaı jasaıdy. Qabanbaı batyr kóshesi, 91-úıde ornalasqan konsýldyqta keńes berý jáne aqparattyq kómek kórsetiledi.
2017 jyly qazaqstandyq stýdent Adına Hamıtova Shvetsııanyń bedeldi «Global Swede Award 2017» syılyǵynyń laýreaty atandy. Syılyqty Eýropalyq Odaq jáne saýda isteri mınıstri Ann Lınde tabys etti.
2021 jyly Qaraǵandy qalasyndaǵy Nazarbaev Zııatkerlik mektebiniń 12-synyp oqýshylary Ánýar Dúısenbekov pen Farhat Nurlanov Koreıada ótken «Jas Ǵalym» VII Halyqaralyq ǵylymı baıqaýynda birinshi oryn aldy. Olar qazylar alqasyna «Soqqy sıpattamalaryn anyqtaý úshin kompozıttik balaýyz jáne grafıt sensorymen basketbol dobyn synaý» ǵylymı jobasyn usyndy. Joba aǵylshyn tilinde qorǵaldy. Zııatkerlik jarystarǵa qatysýshylardyń zertteý jumystaryn AQSh, Ulybrıtanııa, Sıngapýr, Reseı jáne basqa da elderdiń ýnıversıtetteriniń professorlyq-oqytýshylyq quramy baǵalaıdy.
2021 jyly AQSh Kongress kitaphanasynyń arhıvinen «Farab» kitaphanasynyń ǵylymı-zertteý eńbeginiń nátıjesinde «Turkestan» mýzykalyq týyndysynyń plastınkasy tabyldy. Túrli muraǵattyq derekter boıynsha plastınka 1906 jyly nemese 1919 jyly jazylǵan bolýy múmkin.
