«112» biryńǵaı kezekshi-dıspetcherlik qyzmet qurylmaı qalýy múmkin
«2023 jylǵy 1 qańtardan bastap kúshine enetin «Qazaqstan Respýblıkasynyń keıbir zańnamalyq aktilerine tsıfrlyq tehnologııalardy retteý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń 2020 jylǵy 25 maýsymdaǵy Zańymen jergilikti atqarýshy organdarda «112» biryńǵaı kezekshi-dıspetcherlik qyzmetti (BKDQ) engizý úshin quqyqtyq negiz belgilengen. Qyzmettiń negizgi mindeti – qońyraýlardy (oqıǵalar týraly habarlamalardy) elekten ótkizý jáne durys baǵyttaý bolyp tabylatynyn aıta ketý kerek. «112» BKDQ barlyq jedel qyzmetterdi bir qyzmetke biriktirip, biryńǵaı qońyraý kartochkasyn engizedi dep boljanǵan. 2019 jyldan bastap elimizdiń birqatar óńirlerinde (Qyzylorda, Atyraý, Óskemen, Oral, Kókshetaý q.) pılottyq jobalar iske qosyldy. Pılottyq jobalardyń iske asyrylý barysyn taldaı otyryp, birqatar problemalyq máseleler anyqtaldy», - delingen Úkimet basshysynyń jaýabynda.
Onyń atap ótýinshe, «112» BKDQ dıspetcherinde arnaıy bilim men daǵdynyń bolmaýyna baılanysty «112» nómirine kelip túsetin qońyraýlar keıinnen baǵyty boıynsha qyzmet (101, 102, 103) dıspetcherine/operatoryna qosylady. Bul oqıǵaǵa den qoıý ýaqytyn eki ese ulǵaıtady.
«112» BKDQ-nyń jedel qyzmetterdiń kezekshi bólimshelerimen ózara isqımyly barysynda qıyndyqtar, onyń ishinde den qoıý josparlaryna qoljetimdilik boıynsha qıyndyqtar bar. Qazirgi ýaqytta ár qyzmettiń ereksheligine baılanysty jedel qyzmetterdiń kúshteri men quraldaryn ózi basqara alatyn ámbebap dıspetcherge aýytyrý múmkin emes. Shet elderde biryńǵaı qutqarý qyzmetin engizý uzaq ýaqyt boıy júrgizilgenin aıta ketý kerek. AQSh-ta «911» qyzmetin, Eýropalyq Odaq elderinde «112» qyzmetin tolyqqandy iske qosý 20 jyl boıy júzege asyryldy», - dedi Álıhan Smaıylov.
Úkimet basshysynyń atap ótýinshe, «112» BKDQ-ny qurý keshendi vedomstvoaralyq sıpatta jáne ony iske asyrý úshin tehnıkalyq, uıymdastyrýshylyq ári ózge de is-sharalardyń joǵary tıimdiligi talap etiledi. Olar aıtarlyqtaı bıýdjettik salymdy qajet etedi.
«Joǵaryda jazylǵandy eskere otyryp, kúsh-jiger men qarajatty jedel qyzmetterdiń kezekshi-dıspetcherlik bólimsheleriniń qyzmetin odan ári jetildirý jónindegi jumysty júrgizýge baǵyttaǵan oryndy. Osyǵan baılanysty jergilikti atqarýshy organdarda «112» BKDQ-ny qurýǵa qatysty Zań normalaryn alyp tastaý usynylady. Qazirgi tańda Úkimet Zańǵa tıisti túzetýlerdi ázirledi. Olar Qazaqstan Respýblıkasynyń Prezıdenti Ákimshiligimen kelisilgennen keıin Qazaqstan Respýblıkasy Parlamentiniń Májilisine engiziletin bolady», - dedi Premer-Mınıstr.
