«111» nómirine áıelder men balalardan qandaı shaǵym jıi túsedi

ASTANA. KAZINFORM – 2024 jylǵy 1 maýsym men 2025 jylǵy 31 mamyr aralyǵynda «111» baılanys ortalyǵyna shamamen 226 myń ótinish tústi. Bul týraly «Azamattarǵa arnalǵan úkimet» memlekettik korporatsııasynyń Kazinform agenttigi joldaǵan resmı saýaldyń jaýabynda aıtylǵan.

Memlekettik korporatsııanyń málimetinshe, 123 myńnan astam ótinish «111» nómirine qońyraý shalý arqyly, al 103 myńǵa jýyq ótinish QR-kod habarlama arqyly qabyldanǵan.

Kimder jıi habarlasady?

«111» baılanys ortalyǵy ótinishterdi jynysy men jasyna qaraı tirkeıdi. Alaıda ótinish úshinshi tulǵadan, ıaǵnı týysy, pedagog nemese áleýmettik qyzmetshiden túsken jaǵdaıda, jeke klassıfıkatsııasyz esepke alynady. Jalpy, eresekterden shamamen 122 myń ótinish kelip túsken, onyń ishinde 13,5 myńǵa jýyǵy áıelderden, 104 myńy – balalardan.

Eń kóp habarlasatyn óńirler:

• Almaty – 10 myńnan astam; 
• Astana – 6,4 myńnan astam; 
• Shymkent – shamamen 5,6 myń; 
• Túrkistan oblysy – shamamen 6,8 myń; 
• Almaty oblysy – shamamen 6,3 myń. 

Eń az tirkelgen óńirler:

• Soltústik Qazaqstan oblysy – 1,5 myńnan astam; 
• Ulytaý oblysy – shamamen 900; 
• Abaı oblysy – shamamen 1,6 myń. 

Sonymen qatar, Almatyda, Batys Qazaqstan, Túrkistan, Almaty jáne Aqmola oblysynda ótinishterdiń ósýi baıqalyp otyr. 

Áıelder kóbine qandaı máselemen júginedi?

— Áıelderdi aldymen mazalaıtyn turmystyq zorlyq-zombylyq máseleleri. Atap aıtqanda, fızıkalyq, psıhologııalyq, seksýaldyq jáne ekonomıkalyq zorlyq, alıment tólemeý, balany qamqorshylyqqa alý daýy, áleýmettik qorǵaý máselesi, baspanasyz qalý, psıhologııalyq qıyndyqtar men bala tárbıesine qatysty máseleler, — delingen saýal jaýabynda. 

«111» baılanys ortalyǵy habarlasqan jandarǵa keńes berip, psıhologııalyq kómek usynady, qajet bolǵan jaǵdaıda áıelderdi daǵdarys ortalyǵyna nemese tıisti qyzmetke baǵyttaıdy. 

— Eger áıeldiń ómirine, densaýlyǵyna nemese qaýipsizdigine qaýip tónse, qorǵanys nemese daǵdarys ortalyǵyna joldama beriledi. Mundaı jaǵdaıda fızıkalyq, seksýaldyq, psıhologııalyq jáne ekonomıkalyq zorlyq, zorlyq qateri, áleýmettik osaldyq (kishkentaı balalarynyń bolýy, júktilik, baspanasyz qalý taǵy basqa), sondaı-aq áıel ózi kómek surasa da negiz bolady, — delingen jaýapta.

Balalar qandaı máselelermen habarlasady?

Balalar ártúrli sebeppen baılanysqa shyǵady.

— Balalar otbasyndaǵy kıkiljiń, turmystyq zorlyq-zombylyq, ata-ananyń ishimdikke nemese esirtkige táýeldiligi, ata-anasynyń ajyrasýy, elemeý jáne emotsııalyq oqshaýlaý, mekteptegi býllıng, kıberbýllıng, psıhoemotsıonaldyq kúızelis, sýıtsıdtik oı, qatarlastarymen qarym-qatynastaǵy qıyndyqtar, oqý úlgerimi men quqyǵynyń buzylǵany týraly jıi aıtady. Keıbir ótinish boıynsha balamen jaı ǵana sóılesýdi qajet etedi. Bul yqtımal qaýipti der kezinde anyqtaýǵa jáne qajetti kómek kórsetýge múmkindik beredi, - dep túsindiredi memlekettik korporaatsııadan. 

Baılanys ortalyǵy qalaı jumys isteıdi?

«111» baılanys ortalyǵynyń operatorlary qıyn jaǵdaıǵa tap bolǵan otbasylarǵa kómek kórsetý maqsatynda táýlik boıy, demalyssyz, mereke kúnderi de jedel toppen tikeleı baılanysta jumys isteıdi.

— Ortalyq «osy jerde jáne qazir» qaǵıdasy boıynsha jumys isteıdi, ıaǵnı kómek dál júgingen sátte kórsetiledi. Profıldi bilimi bar mamandar dereý áreket etip, tıisti memlekettik organmen, qyzmetpen baılanysyp, keńes beredi, qajet bolsa, psıhologııalyq qoldaý kórsetedi, — dep naqtylady vedomstvo.

Sonymen qatar qajet bolǵan jaǵdaıda uzaq merzimdi súıemeldeý uıymdastyrylady, ásirese qylmystyq ister boıynsha. 

«111» baılanys ortalyǵy birneshe memlekettik organmen birlesip jumys isteıdi: 

• quqyq qorǵaý organdary (qaýip nemese qylmys jaǵdaıynda);
• psıhologııalyq qyzmet (sýıtsıdtik qaýip pen emotsıonaldyq kúızelis kezinde);
• medıtsınalyq uıymdar;
• qorǵanshylyq jáne qamqorshylyq organdary;
• áleýmettik jáne otbasylyq qoldaý qyzmeti;
• bilim berý organdary;
• ákimdik jáne jedel qyzmet.

- Balalardyń quqyqtarynyń buzylýy tirkelgen barlyq jaǵdaılarda óńirlik bala quqyqtary jónindegi ýákilge habarlanady7 Sońǵy 12 aı ishinde tirkelgen ótinishterdiń nátıjesinde 1,5 myńnan astam is quqyq qorǵaý organdaryna qaraýǵa joldandy, — dep habarlady «Azamattarǵa arnalǵan úkimet». 

Ótken jyly «Azamattarǵa arnalǵan úkimettiń» 111 baılanys qyzmetine kimder kóbirek júginetini týraly jazǵan edik.