11 óńirde ınflıatsııa baıaýlady

ASTANA.KAZINFORM — Qarashada elde jyldyq ınflıatsııa 12,4% boldy (qazanda — 12,6%). Bul týraly Ulttyq bank habarlady. 

Jyldyq ınflıatsııa 11 óńirde baıaýlady, 5 óńirde jedeldep, 4 óńirde burynǵy deńgeıde qaldy.

Qarashada azyq-túlik taýarlarynyń baǵasy jyldyq mánde 13,4% boldy (qazanda — 13,5%). Osy top taýarlarynyń baǵasy Ulytaý oblysynda (17,1%) eń joǵary, al Almaty qalasynda (11,2%) eń tómen ósti.

Qarashanyń qorytyndysy boıynsha azyq-túlikke jatpaıtyn taýarlardyń baǵasy jyldyq mánde 11,2% boldy (qazanda — 11,0%). Eń joǵary mán Aqtóbe jáne Jetisý oblystarynda (13,2%-dan), eń tómengi mán Batys Qazaqstan oblysynda (8,6%) tirkeldi.

Qarashada aqyly kórsetiletin qyzmet baǵasynyń ósý qarqyny jyldyq mánde 12,3%-ǵa deıin baıaýlady (qazanda — 12,9%). Sonymen qatar Qyzylorda jáne Mańǵystaý oblystarynda (9,4%-dan) jalpy respýblıkalyq deńgeıden baǵa birshama tómen ósti.

Qarashada el boıynsha aılyq ınflıatsııa 0,8%-ǵa ósti.

Eske salsaq Ulttyq bank tóraǵasy Tımýr Súleımenov Úkimettiń ákimshilik sharalary qarasha aıynda jyldyq ınflıatsııanyń tómendeýine áser etkenin aıtty.