11 myń jumys ornyn ashatyn 38 joba iske asyrylmaq - ShQO

ÓSKEMEN. QazAqparat – Shyǵys Qazaqstan oblysynda sońǵy 5 jyl ishinde eksportqa baǵyttalǵan 38 óndiristik nysan ashylady, dep habarlaıdy QazAqparat tilshisi.

Óńirde 2025 jylǵa deıingi kásipkerlikti qoldaý kartasyna 11,3 myń jańa jumys oryndaryn quratyn 38 joba engizildi. Bul týraly oblys ákimi Danıal Ahmetov halyqqa esep berýinde aıtty.

«2020 jyly 37,5 mlrd teńgege 5 joba iske asyryldy. Onyń ishinde barynsha mańyzdysy jylyna 200 tonna ýran ónimdiligimen AES arnalǵan jylý bóletin quramalar shyǵaratyn zaýyttyń qurylysy boldy. Bıyl 3 myńnan astam jumys ornyn ashýǵa múmkindik beretin, quny 498 mlrd teńgeni quraıtyn 14 ınvestıtsııalyq jobany júzege asyrý josparlanyp otyr», - dedi aımaq basshysy.

Tarbaǵataı aýdanynda qýattylyǵy jylyna 25 mln tonnaǵa deıin ken óndiretin Qyzylqaıyń ken ýchaskesinde ken baıytý kombınatyn salý josparlanǵan. «Qazmyrysh» JShS-men birlesip elektrolıttik tásilmen myryshty alý boıynsha zertteý jelisi quryldy.

«Óńirde shaǵyn jáne orta bızneske basty nazar aýdarylýda. 2020 jyly ShOB-tan bıýdjetke tólemder túsimi 119%-ǵa artyp, 14,1 mlrd teńgeni qurady. «Bıznestiń jol kartasy-2025» memlekettik baǵdarlamasy aıasynda oblys sýbsıdııalanǵan jobalar sany boıynsha 3-shi orynda tur. «Aq nıet» jeńildetilgen nesıelendirýdiń óńirlik baǵdarlamasy sheńberinde barlyǵy 7,2 mlrd teńgege 154 joba qarjylandyryldy», - dedi Danıal Ahmetov.