11 aıda memlekettik bıýdjetke 10 trln teńge kiris tústi

NUR-SULTAN. QazAqparat – 2021 jyldyń 11 aıynda memlekettik bıýdjetke 10 trln 179 mlrd teńge somasynda kiris tústi. Bul týraly búgin Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Memlekettik bıýdjetke 10 trln 179 mlrd teńge somasynda kiris tústi nemese jospar 103,6 paıyzǵa atqaryldy. Respýblıkalyq bıýdjetke 6,7 trln teńge tústi nemese jospar 101,7 paıyzǵa oryndaldy. Jalpy kiris jospary 109 mlrd teńgege asyra oryndaldy. Onyń ishinde salyqtar - 51 mlrd teńgege, salyqtyq emes túsimder - 54 mlrd teńgege. Salyqtar boıynsha asyra oryndaýdyń negizgi somalary korporatıvtik tabys salyǵyna, shıki munaıǵa eksporttyq kedendik bajǵa jáne paıdaly qazbalardy óndirýge salynatyn salyqqa tıesili», - dedi mınıstr.

Onyń aıtýynsha, korporatıvtik tabys salyǵy boıynsha jospardyń asyra oryndalýy 686 iri salyq tóleýshi boıynsha málimdelgen avanstyq tólemder somasynyń 73,2 paıyzǵa ulǵaıýyna baılanysty boldy. Shıki munaıǵa salynatyn eksporttyq kedendik bajy boıynsha jospardyń asyra oryndalýyna osy jylǵy 11 aıda munaı baǵasynyń ortasha eseppen 48,7 paıyzǵa qymbattaýy áser etti. Paıdaly qazbalardy óndirýge salynatyn salyq boıynsha jospardy asyra oryndaýǵa 2020 jyldyń uqsas kezeńimen salystyrǵanda osy jylǵy 11 aıda negizgi eksporttyq pozıtsııalarǵa baǵanyń ortasha eseppen 27 paıyzǵa ósýi yqpal etti.

«Salyqtyq emes túsimder boıynsha jospardy asyra oryndaý negizinen memlekettik menshiktegi aktsııalardyń memlekettik paketterine dıvıdendter jáne memlekettik mekemeler salatyn aıyppuldar, ósimpuldar, sanktsııalar, óndirip alýlar esebinen qamtamasyz etildi», - dedi ol.

Mınıstrdiń dereginshe, ishki óndiris taýarlaryna salynatyn qosylǵan qun salyǵy boıynsha jospar oryndalmady. Іshki óndiris taýarlaryna qosylǵan qun salyǵy boıynsha jospardyń oryndalmaýy ótken jyldyń uqsas kezeńimen salystyrǵanda osy jylǵy 11 aıda qosylǵan qun salyǵyn qaıtarý somasynyń 340 mlrd teńgege nemese 62 paıyzǵa ulǵaıýyna baılanysty bolady.

«Jergilikti bıýdjetterdiń kiristeri 107,5 paıyzǵa atqaryldy jáne 3,5 trln teńgeni qurady. Jospar 243 mlrd teńgege, onyń ishinde salyq boıynsha 202 mlrd teńgege asyra oryndaldy. Josparlar negizgi salyqtardyń barlyq túrleri boıynsha asyra atqaryldy», - dedi Erulan Jamaýbaev.