11 aıda balyq ónimderiniń naryǵy 76,8 myń tonnaǵa jetti
ASTANA. KAZINFORM — 2025 jyldyń 11 aıynyń qorytyndysy boıynsha Qazaqstan Respýblıkasyndaǵy balyq ónimderi naryǵynyń kólemi 76,8 myń tonnaǵa jetip, 2024 jyldyń osy kezeńimen salystyrǵanda 10%-ǵa ósti. Bul týraly AShM baspasóz qyzmeti málim etti.
Bıyl 38,5 myń tonna balyq aýlanyp, 20,9 myń tonna taýarlyq balyq ósirildi. Aýlaný kóleminiń 10%-dy, al akvasharýashylyq boıynsha ósim kólemi 22%-dy qurap, salanyń qarqyndy damýyn kórsetip otyr.
Qazirgi ýaqytta Qazaqstanda halyqaralyq jáne respýblıkalyq mańyzy bar 20 sý aıdyny bar, olar 366 balyq sharýashylyǵy ýchaskesine bólingen.
— Balyqty óńdeýmen jyldyq óndiristik qýaty shamamen 120 myń tonnany quraıtyn 72 kásiporyn aınalysady. Onyń ishinde 20 kásiporyn Eýropalyq odaq elderine ónim eksporttaýǵa quqyly. Qazaqstandyq balyq ónimderi Germanııa, Nıderlandy, Reseı jáne Qytaıdy qosa alǵanda, álemniń 21 eline jetkiziledi. 2025 jyldyń 11 aıynda shamamen 59,4 myń tonna daıyn balyq ónimi óndirildi. Óńdeý kólemin odan ári arttyrý úshin qosylǵan qun salyǵyn 70%-ǵa tómendetý, jyldyq 5% mólsherlememen jeńildetilgen nesıeleý sııaqty memlekettik qoldaý sharalary kózdelgen, — delingen habarlamada.
Bıoalýantúrlilikti saqtaý máselelerine erekshe kóńil bólinip otyr. Memleket basshysynyń tapsyrmasyna sáıkes 2024 jyly Kaspıı ıtbalyǵy popýlıatsııasyn saqtaý maqsatynda aýmaǵy 108,6 myń gektardy quraıtyn «Kaspıı ıtbalyǵy» memlekettik tabıǵı rezervaty quryldy. Sondaı-aq Atyraý bekire balyq ósirý zaýytyn jańǵyrtý jumystary júrgizilýde, bul bekire tuqymdas balyq shabaqtaryn shyǵarý kólemin jylyna 5 mıllıonnan 7,5 mıllıonǵa deıin arttyrýǵa múmkindik beredi.
Saladaǵy ınvestıtsııalyq belsendilik te oń kórsetkish kórsetip otyr. 2021–2024 jyldar aralyǵynda akvasharýashylyq salasynda jalpy somasy 21,4 mlrd teńgeni quraıtyn 87 joba iske asyryldy. 2025 jyldyń 11 aıynda balyq sharýashylyǵyn damytýǵa 4,6 mlrd teńge ınvestıtsııa salyndy.
2025 jyly memlekettik tapsyrys aıasynda baǵaly balyq túrleriniń 21,92 mıllıon shabaq ósirilip, sý aıdyndaryna jiberildi. Memlekettik balyq pıtomnıkterin jańǵyrtý nátıjesinde olardyń óndiristik qýatyn jylyna 18,4 mıllıonnan 80,5 mıllıonǵa deıin ulǵaıtý josparlanyp otyr.
— Qabyldanyp jatqan sharalar kesheni Qazaqstannyń balyq sharýashylyǵy belsendi ári turaqty damý kezeńine ótkenin aıqyn kórsetedi. Memlekettik qoldaýdyń kúsheıýi, salany tsıfrlandyrý, ınvestıtsııalardyń tartylýy jáne ınfraqurylymdy jańǵyrtý óndiris pen óńdeýdi arttyrýǵa, sý ekojúıelerin saqtaýǵa jáne halyqty sapaly balyq ónimderimen qamtamasyz etýge berik negiz qalyptastyrady, — delingen vedomstvo habarlmasynda.
Balyq sharýashylyǵy agroónerkásiptik keshenniń negizgi salalarynyń biri jáne ekonomıkalyq ósimniń, jumyspen qamtýdyń ári eldiń azyq-túlik qaýipsizdigin qamtamasyz etýdegi mańyzdy sala. 2021–2030 jyldarǵa arnalǵan balyq sharýashylyǵyn damytý baǵdarlamasy aıasynda QR AShM Balyq sharýashylyǵy komıteti balyq ósirý kólemin arttyrýǵa, ishki tutynýdy ulǵaıtýǵa jáne sý bıoresýrstarynyń tabıǵı popýlıatsııalaryn qalpyna keltirýge baǵyttalǵan keshendi sharalardy iske asyryp otyr.
Aıta keteıik, buǵan deıin Mańǵystaýda Ortalyq Azııadaǵy alǵashqy teńiz akvasharýashylyq jobasy bastaldy.