102 jastaǵy japon azamaty Fýdzı shyńyna shyǵyp, Gınnestiń rekordtar kitabyna endi

ASTANA. KAZINFORM — Japonııa azamaty Kokıtı Akýdzava 102 jasynda eldiń eń bıik núktesi – 3 776 metrlik Fýdzı taýynyń shyńyna shyǵyp, Gınnestiń rekordtar kitabyna endi. Ol bul erligi arqyly Fýdzıge shyqqan eń qart er adam atandy.

Kokıtı buǵan deıin de birneshe ret Fýdzı shyńyn baǵyndyrǵan, sońǵysy — 96 jasynda bolǵan.

Gınnestiń resmı málimeti boıynsha, 3 tamyz kúni tańerteń Kokıtı eń ońaı (biraq sonda da jeńil emes) sanalatyn Esıda baǵytymen kóterile bastaǵan. Shyńǵa kóterilý ádette shamamen 6 saǵatqa sozylady, biraq Kokıtı joldy jeńildetý úshin ony úsh kúnge sozyp, eki ret taý baspanalarynda túnegen. Jolda ol sýyq pen qatty jelge tótep berip, atmosferalyq qysym men ottegi deńgeıiniń tómendeýin bastan ótkerdi – bul jaǵdaılar tipti jas adamdar úshin de aýyr synaq.

Alǵashqy eki kún sátti ótti, biraq úshinshi kúni Kokıtı ózin nashar sezinip, toǵyzynshy aıaldama mańynda joldy jalǵastyrýdan bas tartqysy keldi.

Joldastary ony toqtatýǵa qarsy bolmady, sebebi sońǵy bir jylda ol aýyr kezeńderdi bastan ótkergen: qysta taýǵa shyqqan kezde súrinip qulaǵan, keıin beldeýlik temiretkimen aýyrǵan, júrek jetkiliksizdigin bastan ótkergen. Soǵan qaramastan, kún saıyn tańerteń erte turyp, bir saǵat serýendep, aptasyna birneshe ret taýǵa shyqqan.

Ony jalǵastyrýǵa kóndirgen jalǵyz adam — 70 jastaǵy qyzy boldy. Ol ákesine: «Bir qadamnan bastaıyq. Jalǵastyra ber!» — dep jiger berdi.

Aqyry 5 tamyz kúni Kokıtı Fýdzı taýynyń shyńyna aman-esen jetti.

Odan taǵy da taýǵa shyǵý oıy bar-joǵyn suraǵanda, ol ázilmen:  — «Endi eshqashan!» — dep jaýap berdi.

— Kelesi jyly surasańyz, múmkin, oıym ózgerer. Qazirshe osy jetistikke qýanyshtymyn, — dedi biraq artynsha.

Budan buryn Ózbekstanda bir kúnde 1 900-den astam robot qurastyrylyp, el Gınnes rekordtar kitabyna engenin jazdyq.