102 gıdrotehnıkalyq qurylys sý tasqyny qaýpi bar nysandar qatarynda - mınıstr

ASTANA. QazAqparat – Qazaqstanda jóndeýdi qajet etetin 41 gıdrotehnıkalyq qurylys qaıta jańartylyp jatyr. Bul týraly Ekologııa jáne tabıǵı resýrstar mınıstri Zúlfııa Súleımenova aıtty, dep habarlaıdy QazAqparat.

«Búgingi tańda «Qazsýshar» RMK teńgerimindegi 206 gıdrotehnıkalyq qurylystyń 102-si sý tasqyny qaýpi bar obektiler qataryna jatqyzyldy. Sý basý aımaǵynda 102 obekt 296 eldi mekenge jaqyn ornalasqan, onda 2 547 649 adam turady», - dedi Ekologııa mınıstri Úkimettiń búgingi otyrysynda.

Onyń aıtýynsha, sý toraptary men sý qabyldaǵyshtar qanaǵattanarlyq jaǵdaıda.

«Sý basý qaýpin joıý maqsatynda mınıstrlik jóndeýdi qajet etetin 41 gıdrotehnıkalyq qurylys qaıta jańartylyp jatyr. 2017-2022 jyldary 16 nysan qalpyna keltirildi. Nátıjesinde 120 myńnan astam halqy bar 19 aýyldyq eldi mekende sý tasqyny joıyldy. Onyń ishinde Almaty oblysynda jınaqtaý kólemi 42 mln tekshe metr Qyzylaǵash sý qoımasy qaıta jańartyldy. Bıyl taǵy 2 sý qoımasy qalpyna keltiriledi. Osy jobalar iske asyrylǵan jaǵdaıda 300 myń halqy bar 40 eldi mekendi sý basý qaýpi máselesi sheshilmek», - dedi Z. Súleımenova.