100 jańa esimge engen kásipker: Eshkimnen jumys suramańyzdar, bıznespen aınalysyńyzdar
Aıta keteıik, Islambek Saljanov «Altyn Qyran» kompanııalar toby men «Altyn Kyran» halyqaralyq qaıyrymdylyq qoryn qurǵan. Qazaqstan Ulttyq Kásipkerler Palatasynyń Prezıdıým múshesi, Aqtóbe oblystyq kásipkerler palatasy óńirlik keńesiniń tóraǵasy atanǵan.
«Biz bıznes bastaǵan 90-jyldar men qazirgi zamannyń arasy jer men kókteı. 1993 jyly medınstıtýtty bitirgenimde, elimiz asa aýyr jaǵdaıda edi. Odaq tarap, naryqtyq ekonomıka endi qalyptasyp jatqan. Ekinshi deńgeıli bankter atymen bolǵan joq. Biz jeke bıznestiń ne ekenin bilmedik, ádebıetter bolmady. Deıl Karnegıdiń jalǵyz kitabyn qoldan-qolǵa ótkizip, kapıtalızmniń qalaı jumys isteıtinin túsine bastadyq. Aýylda, azyq-túlik naryǵynan bastap, búgingi kúnge jettim. Eń bastysy berilmeý, qatelik jasaýdan qoryqpaý», - dedi Islambek Saljanov QR Tuńǵysh Prezıdenti - Elbasy kitaphanasynda ótken «Meniń tabysymnyń tarıhy - el tabysynyń tarıhy» atty shyǵarmashylyq kezdesýde.
Kásipker kezdesýge kelgen stýdentter men oqýshylardy bıznespen aınalysýǵa shaqyrdy.
«Kásipker retinde barlyǵyńyzdy bıznespen aınalysýǵa shaqyramyn. Árıne, birinshi ózińe yńǵaıy keletin mamandyqty nemese salany tańdap alǵan jón. Súıikti isińmen aınalysyp, odan úlken lázzat alyp, qomaqty qarajat taba alasyń (...) Jastarǵa aıtarym, eshkimnen jumys suramańyzdar. Bıznespen aınalysyp, ózderińiz jumys oryndaryn ashyńyzdar. (...) Qazaqstanda kásipkerlikke qoldaý óte joǵary deńgeıde kórsetilip keledi. Jastar arasyndaǵy kásipkerlikten bastap, aýyl sharýashylyǵy salasyna deıin túrli baǵdarlamalar bar. «Bastapqy kapıtaldy qaıdan tabamyn?» dep suraıtyndar bar. Jaqsy jobaǵa ınvestor tabylady. Qaıtarymsyz granttar da kóptep berilýde. Eń bastysy, jaqsy ıdeıa men ynta-yqylas kerek», - dedi ol jastarǵa.
Sondaı-aq, I. Saljanov úzdiksiz kitap oqýdy óz tabysynyń syry dep estepteıdi jáne jastarǵa aǵylshyn tilin jetik úırenýge keńes berdi.
«O basta kitap oqýdy qolǵa aldym jáne áli kúnge deıin kitap oqýǵa erekshe mán beremin. Іri kompanııalar men bıznesmender týraly jiger beretin kitaptar jaqsy kómektesedi. Buryn qajetti kitaptardy Máskeýden alatyn edim, qazir aýylda otyryp-aq, ınternetten úzdik bestsellerlerdi oqýǵa bolady. Ol úshin aǵylshyn tilin bilý kerek. Aǵylshyn tili - birinshiden, halyqaralyq til, ekinshiden bıznes tili. «Rýhanı jańǵyrý» aıasynda úzdik kitaptar qazaq tiline aýdarylyp jatyr, biraq jer júzindegi barlyq oqýlyqty aýdarý múmkin emes. Jyl saıyn mıllıondaǵan jańa kitaptar jaryq kóredi. Álemdik úrdisten qalyp qoımaý úshin, jalǵyz jol - aǵylshyn tilin úırenip, túpnusqada oqý», - dep keńes berdi I. Saljanov.
Kezdesýde «100 jańa esim» jobasynyń ózge de jeńimpazdary - N. Joldybalın, N. Dementeva jáne M. Chernýtskıı qatysyp, ómirlik tájirıbelerimen bólisti.
