100 jańa esim jobasy jeńimpazǵa ne beredi
Kezdesýge respýblıkanyń azamattyq sektorlaryndaǵy tájirıbeli ókilder, QR Parlamenti Májilisiniń, Astana qalasy máslıhatynyń depýtattary, qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń jumys toby músheleri qatysty jáne onda «Qazaqstannyń 100 jańa tulǵasy» jobasyna úmitkerlerdi usyný jáne irikteý máseleleri jáne ondaǵy azamattyq sektor róli talqylandy.
Aıta keteıik, qoǵam belsendileri Mahabbat Esen, Zınaıda Pak, Pavel Koktyshev, Arman Nurǵazın jáne Erjan Baǵdatov kópshilikke tanymal emes perspektıvti azamattardy izdeý jáne olarǵa qoldaý tanytý úshin «Bıýro 100» bastama tobyn qurǵan edi. «Bıýro 100» múshesi, jýrnalıst Mahabbat Esen bul toptyń jaı ǵana azamattyq bastama ekenin atap ótti.
«Men eshqandaı mınıstrlikte, memlekettik organda jumys istemeımin. Men bar bolǵany qoǵamdaǵy jańalyqtarǵa beı jaı almaıtyn belsendi azamatpyn. «Bıýro 100» toby da azamattyq bastama, eshqandaı ulttyq qozǵalys emes, úkimettik emes uıym qataryna jatpaıdy. Bastamashyl top atynan bul jobaǵa qyzmet etýge daıyn ekenimizdi jetkizgim keledi, sebebi halyq jańa tulǵalarǵa zárý, olardy nasıhattaýǵa bar kúsh-jigerdi salý kerek», - dedi ol.
Sondaı-aq, jıyn barysynda júz jańa esim qalaı irikteledi, joba jeńimpazdarǵa ne beredi, úmitkerlerdi qalaı yntalandyrý qajet degen suraqtar qoıyldy.
«Eger azamattyq qoǵam úzdik shyqqan júz biregeı tulǵaǵa qatysty qandaı da bir usynystar bildirse, ony júzege asyrýǵa memlekettiń múmkindigi jetedi. Halyq arasynan jańa Dımash tabylsa, nege ony bedeldi baıqaýlarǵa jibermeske? Daryndy ǵalym tabylsa, nege onyń zerthanalarda jumys isteýine qol ushyn sozbasqa? Eń bastysy, jeńimpazdarǵa aqparattyq keńistik beriledi. Bul keıbirine óz brendıngin qalyptastyrýǵa yqpal etedi, tanymaldylyq ákeledi, bul úlken múmkindik», - dep jaýap berdi Mahabbat Esen.
Sondaı-aq, jıyn barysynda QR Palamenti Májilisiniń depýtaty, Qoǵamdyq sanany jańǵyrtý jónindegi ulttyq komıssııanyń jumys tobynyń múshesi Pavel Kazantsev te sóz alyp, irikteý jumystarynyń qyzý júrip jatqanyn jetkizdi.
«Árıne, jumys tobynyń aldynda qıyn mindet tur, júz ǵana adamdy iriktep alý ońaı emes. Bul bastamanyń negizgi maqsaty eleýsiz júrgen erekshe taǵdyr ıelerin tabý, eline eńbegi sińgen laıyqty azamattardy halyqqa tanystyrý. Ýaqyt óte kele, naǵyz júz tulǵany halyqtyń ózi-aq, iriktep alar, eń bastysy barsha Qazaqstan júz myńdaǵan úmitkerdiń úlgi bolarlyqtaı erekshe ómir jolymen tanysady, tamsanady, elikteıdi. Osyǵan basa mán berý kerek», - dedi ol.
Eske sala ketsek, Memleket basshysy Nursultan Nazarbaev óziniń «Bolashaqqa baǵdar: rýhanı jańǵyrý» atty maqalasynda «Qazaqstandaǵy 100 jańa esim» jobasyn júzege asyrýdy usyndy.
«Ult maqtanyshy bizdiń burynǵy ótken batyr babalarymyz, danagóı bılerimiz ben jyraýlarymyz ǵana bolmaýǵa tıis. Men búgingi zamandastarymyzdyń jetistikteriniń tarıhyna da nazar aýdarýdy usynamyn. Bul ıdeıany «Qazaqstandaǵy 100 jańa esim» jobasy arqyly iske asyrǵan jón. Elimizdiń Táýelsizdik jylnamasy jazyla bastaǵanyna nebári 25 jyl boldy. Bul tarıh turǵysynan qas qaǵym sát desek te, elimiz úshin ǵasyrǵa bergisiz kezeń. Árıne, jasalǵan jumystardyń mańyzy men aýqymyna eshbir kúmán joq. Degenmen, osy qyrýar isti atqarǵan, el damýyna zor úles qosqan azamattardyń ózderi men olardyń tabysqa jetý tarıhy ádette qurǵaq faktiler men tsıfrlardyń tasasynda qalyp qoıady. Shyn máninde, Qazaqstannyń árbir jetistiginiń artynda alýan túrli taǵdyrlar tur», - deıdi Elbasy maqalasynda.
Jobamen Aqparat jáne kommýnıkatsııa mınıstrligi men Qazaqstan xalqy Assambleıasy Hatshylyǵy aınalysatyn boldy. Maýsym aıynyń basynda El.kz ınternet-portaly bazasyndaǵy 100esim.el.kz saıtynda ótinim qabyldaý bastaldy.
