100 esim: Balalar dárigeri ata-analarǵa arnap mektep ashty

NUR-SULTAN. QazAqparat – Balalar dárigeri jáne reabılıtolog Latıf Parpıev «Qazaqstannyń 100 jańa esimi» jobasynyń qatysýshysy atandy. Tórt jyl boıy balalardy ońaltýmen aınalysyp kele jatqan dáriger volonter jáne «28 petel» halyqaralyq qaıyrymdylyq klýbynyń vıtse-prezıdenti bolyp jumys isteıdi. Latıf Parpıev balalardy qalaı emdeıtinin jáne ol qurǵan jobalardyń mıssııasy týraly aıtyp berdi, dep habarlaıdy QazAqparat tilshisi.

Dárigerdiń aıtýynsha, qordyń jumysy Qazaqstanda ǵana emes, shetelde de nasıhattalyp keledi.

«2019 jyly balalar múgedektigi men shala týǵan balalar arasyndaǵy múgedektikti zertteı otyryp, jańa baǵyt ashýǵa sheshim qabyldadym. Múgedektigi bar balalarda paıda bolatyn barlyq asqynýlardyń sıpaty bir – báriniń birdeı bulshyqet toby zaqymdalady. Eresek kezeńde – máselen eki jastan keıin balalardy emdeý qıyndaıdy. Sondaı-aq, balalardy erte dıagnostıkalaý boıynsha mamandar jetispeıdi, ortalyq júıke júıesi tarapynan qate dıagnozdar qoıylady», - dep atap ótti dáriger jýrnalıstermen suhbatynda.

Latıf Parpıev «Reanımatsııa jaǵdaıynda balalardy erte ońaltý», «Jańa týǵan náresteler patologııasy jaǵdaıynda balalardy erte ońaltý» jáne «Ata-analarǵa arnalǵan mektep» atty jańa jobalardy ashqan.

Spıkerdiń aıtýynsha, olardyń negizgi maqsaty – balalar arasyndaǵy múgedektikti azaıtý, keıinirek týyndaýy múmkin asqynýlardy azaıtý.

«Bir jarym jyldan beri basqa qalalarǵa baryp, dárigerlerdi tegin oqytamyn jáne oń nátıjeleri baıqalyp keledi. «Ata-analarǵa arnalǵan mektep» jobasynda alǵash ret balaly bolǵandar balaǵa kútim jasaýdy, otyrǵyzýdy, júrgizýdi úırenedi. Áleýmettik jelilerde fızıkalyq damý kezeńderin kórsetetin arnaıy beınematerıaldar bar», - dep túsindirdi L. Parpıev.

«28 petel» klýby 2012 jyldan beri 12 elde jumys isteıdi jáne 150 qalany qamtıdy. Dárigerdiń aıtýynsha, 2,5 myńnan astam erikti kıim toqyp, olardy perınataldyq ortalyqtarǵa ótkizedi. Al «Balalardy erte ońaltý» jáne «Ata-analarǵa arnalǵan mektep» jobalary 2019 jyldan beri jumys istep keledi.

«Ońaltýda ár túrli emder qamtylady. Ár balaǵa jeke baǵdarlama tańdalady – kınezoterapııa, massaj, túzetý emi, jattyǵý terapııasy. Dıagnozǵa baılanysty arnaıy emdeý kýrstaryn tańdaımyz. Mysaly Tserebraldy sal aýrýy nemese nevrologııalyq aýrýlary bar balalarmen uzaq jumys isteý kerek - bir kýrs emes, 20-30 kýrsqa sozylady. Mysaly, maǵan tórt jasar bala keledi, ony aıaqqa turǵyzǵansha 36 ońaltý kýrsynan óttik», - deıdi dáriger.

Sonymen birge, L. Parpıev «Qazaqstannyń 100 jańa esimi» jobasyna qatysý týraly aıtyp berdi.

«Meni jobaǵa usynǵany týraly keshe keshke estidim. Árıne, qýandym. Ekinshi jaǵynan, bul jobaǵa qatysý osyndaı dıagnozy bar balalarǵa, olardyń ata-analaryna kóbirek paıda ákeledi dep oılaımyn. Kóptegen balalar ońaltýdy ala almaıdy, óıtkeni ata-analar bul týraly bilmeıdi. Eger olar meni osy jobada jeńimpaz etip tańdasa, adamdar kóbirek habardar bolar edi jáne odan da kóp balalardy qutqarýǵa bolady. Eń bastysy – balalarǵa kómektesý», - dedi L. Parpıev.