100-den asa áskerı qyzmetshi alǵash ret parashıýtpen sekirdi
Olardyń barlyǵy parashıýtpen sekirý, jaýyngerlik daıyndyq baǵdarlamasynyń aınymas bóligi bolyp tabylatyn Desanttyq-shabýyldaýshy áskerde qyzmet atqarýda.
Bir aı kóleminde birinshi desanttyq-shabýyldaýshy batalonynyń merzimdi qyzmettegi áskerı qyzmetshileri arnaıy keshende bastapqy áýe-desanttyq daıyndyqtan ótti. Olar parashıýt júıesiniń qurylymyn, onyń taktıkalyq-tehnıkalyq sıpattamalaryn, negizgi jáne qosymsha parashıýtti salýdyń retin, sondaı-aq jerústi sekirý elementterin pysyqtaýdy oryndady.
Áýe-desanttyq daıyndyq boıynsha birinshi desanttyq-shabýyldaýshy batalony komandıriniń orynbasary maıor Danııar Syzdyqov atap ótkendeı, sekirý aldynda árbir áskerı qyzmetshiniń moraldy-psıhologııalyq jaǵdaıy tekserildi. Sebebi sekirýge ruqsat alý úshin, psıhologııalyq daıyndyqtan ótý eń mańyzdy shart bolyp tabylady.
Qatardaǵy merzimdi qyzmetker Jaqsylyq Makkemaden – bul kúni naǵyz áskerı desantshyǵa tán alǵashqy parashıýtpen sekirýin oryndady.
«Bul erekshe sezim, aspanmen astasqandaı áserde qalasyń. Tikushaq bortynda qorqynysh qýanyshqa ulasty. Men aspanǵa kóterildim. Boıymdy adrenalın sharpyp, jan-dúnıeńdi de alyp ushqandaı bolady. Parashıýt ashyldy. Endi mine, men naǵyz desantshy atandym» – dep birden jerge túskennen keıingi sezimderimen bólisti.
Daıyndyq josparyna sáıkes Desanttyq-shabýyldaýshy áskerdiń merzimdi qyzmettegi áskerı qyzmetshilerdiń jas tolymdary kem degende eki ret parashıýtten sekirýdi oryndaıdy. Birinshisin júzege asyrǵanymen, endigi kezekte desantty daıyndaýdaǵy mańyzdy bóligi bolyp tabylatyn qarýmen sekirýdi oryndaýǵa týra keledi.
