10 jyldan keıin Qazaqstandaǵy klımat qandaı bolady

ASTANA. KAZINFORM – Ekologııa jáne tabıǵı resýrstar mınıstrligi Klımat saıasaty departamenti klımattyń ózgerýine beıimdelý basqarmasynyń bas sarapshysy Aıjan Mamedalıeva Kazinform saýalyna joldaǵan jaýabynda eldegi klımat ózgerisi týraly zertteýlerdiń alǵashqy nátıjelerin aıtty.

«Qazaqstan da Ortalyq Azııanyń ózge elderi sııaqty klımat ózgerisine osal el bolyp esepteledi. Keıingi onjyldyqtarda Qazaqstandaǵy aýa temperatýrasy aıtarlyqtaı kóterildi. Jyldyq ortasha temperatýra ár 10 jyl saıyn Tselsıı shkalasy boıynsha 0,32 gradýs artyp otyr. 2030 jyly bul kórsetkish 1,7-1,9 gradýs, 2050 jyldary 2,4-3,1 gradýs, 2100 jylǵa qaraı 3,26 gradýs kóteriledi», - deıdi maman. 

Aıjan Mamedalıevanyń aıtýyna qaraǵanda, temperatýranyń ekstremaldy deńgeıde artýy adam densaýlyǵyna, tabıǵı ekojúıege, aýyl jáne sý sharýashylyǵyna, ınfraqurylymǵa keri áser etýi múmkin. 

«Jyldyń ishinde túsetin jaýyn-shashyn kóleminiń ózgerý qurǵaqshylyqty ýshyqtyryp, eldegi ylǵaldyń qoryn azaıtyp, sý tapshylyǵyn arttyrýy yqtımal. Klımattyń ózgerýinen muzdyqtar erip, shóleıttený jedeldeıdi. Ortalyq Azııada muzdyqtar jylyna 0,2-1% azaıyp jatyr. Keıingi 50-60 jylda Tıan-Shan men Pamır taýlarynda muzdyqtar 14-ten 30 paıyzǵa erip ketken», - deıdi sarapshy.