10 mln teńge kóterme aqy: 80-ge jýyq dáriger Jetisý oblysyna qonys aýdarmaq
TALDYQORǴAN. KAZINFORM — Jetisý oblysynda medıtsınalyq kadrlardyń tapshylyǵy problemasyn sheshý úshin bıyldan bastap kóterme aqy tólenedi. Endi óńirge kelgen dárigerler aýyldyq jerde jumys isteıtin bolsa, 10 mln. teńgeden jáne qalada jumys istegen jaǵdaıda 5 mln. teńgeden alady. Densaýlyq saqtaý basqarmasynyń habarlaýynsha, ótken jyly óńirde dárigerlik kadrlardyń tapshylyǵy 8%-ǵa tómendegen. Bul týraly oblys ákiminiń baspasóz qyzmeti málimdedi.
Jyl basynan beri oblysqa 76 maman kelgen.
— Oblys ákimi Beıbit Isabaevtyń bastamasymen oblysymyzǵa kásibı medıtsınalyq kadrlardy tartý úshin birjolǵy kóterme aqy tóleý týraly sheshim qabyldandy. Bıyl osy maqsatqa 595 mln. teńge bólindi. Osy kezeńde aýyldyq jerlerge kelgen 9 dárigerge 10 mln. teńgeden, al, qalaǵa kelgen 16 dárigerge 5 mln. teńgeden tólendi. Bıylǵy shildeden qazanǵa deıin jumysqa qabyldanǵan taǵy 45 dárigerge jyl sońyna deıin kóterme aqy tóleýdi josparlap otyrmyz. Bul qoldaýdy 3 aılyq synaq merziminen sátti ótken jaǵdaıda alýǵa bolatyndyǵyn atap ótemin. Óńirdiń medıtsınalyq mekemesinde 5 jyl jumys isteý qajet. Bul kezeńde bizge 186 maman jetispeıdi, jyl sońyna deıin olardyń sany azaıady. Bul rette bul máseleni sheshý úshin birjolǵy kóterme aqy tóleý jaqsy demeý bolyp tabylady, — dedi oblystyq densaýlyq saqtaý basqarmasynyń basshysy Arman Janseńgirov.
Aıta keteıik, jyl saıyn oblysqa 80-ge jýyq jas maman keledi. Solardyń biri — 17 jyldyq eńbek ótili bar hırýrg Nurmuhamed Baıjanov, ol Qabanbaı aýylyndaǵy Alakól aýdandyq ortalyq aýrýhanasynyń bólimshesine jumysqa kelgen. Ol aýyldyq aýrýhanaǵa jumysqa 6 aı buryn kelip, qoldaý retinde 10 mln. teńge kóleminde kóterme aqy alǵan. Jergilikti ákimdik onyń otbasyn qajetti turǵyn úımen qamtamasyz etti.
— Árıne, jumys isteý ońaı emes, kishigirim jaraqattardy qospaǵanda, kúnine 2-3 kúrdeli ota jasalady. Biraq, biz, dárigerler bul joldy ózimiz tańdadyq. Bizdiń basty mindetimiz — adamdarǵa kómektesý. Balalardyń aýyr jaraqattarmen túsken kúrdeli jaǵdaılar da boldy, ondaı sátte mınýttyń ózi mańyzdy. Barlyq jaýapkershilikti ózińe alasyń. Mende 4 sertıfıkat bar. Ózim jalpy eresek, jalpy balalar hırýrgymyn, balalar travmatologymyn, balalar ortopedimin, balalar ýrologymyn. Sondyqtan, emshektegi sábılerge deıin ártúrli operatsııalar jasaı alamyn. Bólimde laparoskop bar ekendigi qýantady, bul barlyq aýrýhanalarda bola bermeıdi. Al, zamanaýı medıtsınalyq jabdyqty paıdalaný jumysty birneshe ese jeńildetedi, operatsııadan keıin naýqastyń qalpyna keltirý protsesin jedeldetedi, — deıdi maman.
Alakól OAA dırektorynyń orynbasary Elmıra Serikovanyń aıtýynsha, 5 jańa maman baǵdarlama boıynsha qabyldandy, olarǵa 10 mln. teńgeden tólendi. Atap aıtsaq, 2 hırýrg, 2 reanımatolog jáne akýsher-gınekolog.
Sondaı-aq, óńirde medıtsınalyq kadrlar tapshylyǵy problemasyn sheshýmen qatar, densaýlyq saqtaý ınfraqurylymyn damytý boıynsha sharalar qabyldanyp jatqanyn atap ótken jón. Atap aıtqanda, 2024 jyldyń sońyna deıin alǵashqy medıtsınalyq-sanıtarlyq kómek nysandary 94 aýylda paıdalanýǵa beriledi, onyń ishinde 3 — jańa qurylys, 27 — blokty-modýldik medıtsınalyq pýnktter, 59 — «Aýylda densaýlyq saqtaýdy jańǵyrtý» ulttyq jobasy sheńberinde, taǵy 5-eýi kúrdeli jóndeýden ótedi.
Jetisý oblysynda qabyldanyp jatqan sharalardyń nátıjesinde 261 densaýlyq saqtaý nysanynyń 136-sy jańartylady, jańartý deńgeıi 52%-dy quraıdy.
