1 sáýirden bastap balany mektepke tirkeý úshin qandaı qujat ótkizý qajet
ASTANA. KAZINFORM – 6 jasqa tolyp úlgermegen balany mektepter qabyldaı ma? Astanadaǵy óńirlik kommýnıkatsııalar qyzmetinde ótken baspasóz máslıhatynda qalalyq bilim basqarmasynyń basshysy Qasymhan Senǵazıevke osyndaı suraq qoıyldy.
«Mamandandyrylǵan mektepterden basqa mektepterdiń bári 1 synypqa baratyn balalardy eshqandaı emtıhansyz qabyldaıdy. Ár mektepte ata-analarǵa kómek kórsetetin 1 synypqa qabyldaý komıssııalary quryldy. Ata-analar qujattardyń «Elektrondy úkimet» veb-portaly arqyly da, mektepke baryp qaǵaz túrinde de tapsyra alady.
Qujat tapsyrǵan kezde ata-ananyń balasyn mektepke qabyldaý týraly ótinishi, medıtsınalyq anyqtama, balanyń profılaktıkalyq ekpeler kartasy, densaýlyq pasporty men 3\4 sýreti bolý kerek. Qujattardy qaǵaz túrinde ótkizseńiz, ata-ananyń nemese balanyń zańdy tulǵasynyń jeke kýáligi qajet bolady», - dedi Qasymhan Senǵazıev.
Baspasóz máslıhaty kezinde ata-analar áleýmettik jeli arqyly basqarma basshysy ataǵan qujattardyń túpnusqasy balabaqshada 1 mamyrǵa deıin saqtalatynyn aıtyp, túpnusqany erte alý máselesin sheshýdi surady.
«Balańyz balabaqshadan shyqqanǵa deıin búkil qujattardyń túpnusqasy sol balabaqshada bolady. Bizde qujattardy mektepke qujat qabyldaý sáýirden tamyzǵa deıin. Eger qazir tapsyramyn deseńiz, mektepter densaýlyq pasporty, ekpe kýálikteri sııaqty qujattardyń kóshirmesin qabyldaı beredi. Bul mektepke tirkelý quqyǵyn beredi. Balańyz balabaqshadan shyqqan kezde nemese mektepke barǵan kezde túpnusqalardy qosymsha jetkizýge bolady», - dedi basqarma basshysy.
Sondaı-aq, ol ata-analarǵa balanyń qujatyn mektepke ótkizýdiń eki jol bar ekenin qaıtalap eske saldy, ıaǵnı mektepke óz aıaǵymen baryp qujat ótkizýden bólek, qashyqtan eGov elektrondyq úkimet arqyly tsıfrlyq nuqsadaǵy qujattardy ótkizý múmkindigi bar.
Elektrondy tásilmen qujat ótkizgen ata-anaǵa balabaqshadan qujattardyń túpnusqasyn surap, kóshirmesin alýdyń qajeti de bolmaıdy.
Bilim basqarmasynyń mamandary qujatty eki tásilmen ótkizgen kezde de mektep ákimshiligi balanyń bilim oshaǵyna qabyldanǵanyn nemese kezek tolyp ketkenin birden aıtatynyn túsindirdi. Qujatty túpnusqamen nemese kóshirmemen ótkizý, elektrondy jolmen tapsyrý mektepten oryn alý isinde eshkimge eshqandaı artyqshylyq bermeıdi.
